Notícies Veir istoric
Er Ajuntament de Vielha e Mijaran met en marcha un nau sistèma de gestion intèrna entath Departament d’Òbres e Servicis deth municipi
Aguest estrument consistís en una plataforma web e ua aplicacion entà telefòns mobils que servís entà gestionar prètzhèts, incidéncies e era eficiéncia energetica, en tot èster un sistèma simple, e que supause era eliminacion deth papèr
Aguesta setmana s’a metut en foncionament un nau sistèma de gestion intèrna en Departament d’Òbres e Servicis der Ajuntament de Vielha e Mijaran, laguens des accions que se vòlen amiar a tèrme des der airau de Naues Tecnologies entà modernizar era administracion e arténher ua ciutat intelligenta, eficienta e sostenibla. Aguesta aplicacion consistís en ua plataforma web e ua aplicacion entà telefòns mobils, qu’a coma objectiu era gestion de prètzhèts, incidéncies, er inventari municipau e era eficiéncia energetica de totes es bastisses municipaus. Per tant, aguest estrument organize toti es prètzhèts en un unic sistèma, en tot facilitar eth trabalh dera brigada.
Tanben compde damb un espaci dirigit as EMD de Vielha e Mijaran, de manèra qu’es sòns presidents tanben an era possibilitat d’interactuar e notificar incidéncies sus çò que passe en cada pòble deth municipi. Ath delà, era aplicacion compde damb estadistiques sus es incidéncies creades (temps de resolucion, bastisses mès problematiques, usatgèrs que mès empleguen era aplicacion...), de manèra que i a un contròl mès exaustiu sus totes es notificacions que se genèren.
Era implementacion d’aguest estrument en Ajuntament de Vielha e Mijaran supause un pas mès ena modernizacion dera administracion locau. Vielha e Mijaran hè diuèrsi ans que sage d’adaptar-se as naui tempsi, e as naues tecnologies. Cau rebrembar, qu’a compdar de 2017, eth municipi compde damb era App de Participacion Ciutadana, a trauès dera quau, era ciutadania pòt interactuar directament damb er Ajuntament entà avertir quinsevolh tipe d’incidéncia e, ara, damb aguesta naua plataforma se pòden classificar aguestes incidéncies ciutadanes e d’autes que poguen aparéisher entà que se poguen resòlver.
"Era incorporacion d’aguest estrument permet facilitar eth trabalh qu’amiam a tèrme des der Ajuntament, en tot establir ua programacion des prètzhèts e incidéncies que s’an de resòlver en municipi", comente era còsso de Naues Tecnologies, Vanessa Fandiño. E hig que "Vielha e Mijaran auance ena modernizacion dera administracion locau. Enes tempsi actuaus, enes qu’es administracions s’an d’adaptar as naues tecnologies, cau èster ath capdeuant a nivèu tecnologic entà assolidar aguesta modernizacion".