Notícies Veir istoric
Tony Herrera destaque eth papèr clau des arrius en sòn entorn
En ua conferéncia ena sala Era Audiovisuau de Vielha
Diuendres 12 de seteme, era sala Era Audiovisuau de Vielha acuelhec era conferéncia de Tony Herrera titolada ‘Desafíos mundiales del agua’, laguens deth projècte europèu Sud’Eau 2, a on eth membre dera la Fundación Nueva Cultura del Agua (FNCA) exposèc eth papèr clau des arrius ath sòn entorn e bèri des problèmes mès impactanti ena mala gestion des arrius. Ath finau dera charrada, se generèc un debat damb es assistents ath torn des arrius e era aigua ena Val d’Aran.
Ena prumèra part dera conferéncia, eth ponent andalós expliquèc era importància des arrius en ecosistèma e eth sòn papèr tant a nivèu economic coma sociau. Dempús, se tractèren es dolentes abituds ena gestion des arrius, nomentada ‘vielha cultura’, e com a variat enes darrèri tempsi en ua ‘naua cultura’, mès sostenible, racionau e que pren consciéncia damb es corrents aquatiques.
Se visualizèren bèri des problèmes mès coneishudi ath torn dera aigua e ena insisténcia e impoténcia des umans entà superar era fòrça dera natura, coma er auragan Katrina o era restanca des Tres Gargamèles en China damb ua longitud superiora as 2.300 mètres.
Entà finalizar era sua ponéncia, Herrera e eth public debateren sus diuèrsi ahèrs problematics ena Val d’Aran en relacion damb era aigua e es arrius, coma per exemple: es aiguats de junh de 2013, era cultura dera gratuïtat e males abituds rotinaries e era biodiuersitat ena ribèra der arriu Garona.
Aguesta conferéncia s’enquadre laguens deth projècte Sud’Eau 2 e preten hèr préner consciéncia ara ciutadania sus era importància dera preservacion der aigua e es arrius. Enes pròplèus setmanes se realizaràn mès eveniments en Vielha que tanben se tròben laguens deth Sud’Eau 2.