Notícies Veir istoric
Er Ajuntament de Vielha e Mijaran realize trabalhs de melhora en depòsit d’aigua de Vielha, plaçat en Cap dera Vila
Pendent aguesta setmana s’amien a tèrme trabalhs de mantenement deth hilat d’aigües en tarcumèr idraulic deth depòsit, de manèra que serà barrat temporaument er accès as veïculs en Cap dera Vila
Er Ajuntament de Vielha e Mijaran a iniciat aguesta setmana ua intervencion de melhora en depòsit d’aigua de Vielha, plaçat en Cap dera Vila. Aguesti trabalhs an coma objectiu contunhar damb eth mantenement deth hilat d’aigües deth cap-lòc dera Val d’Aran. Aguesta accion, que s’amie a tèrme en tarcumèr idraulic deth pròpri depòsit, se realize sus era aigua qu’arribe en dipòsit e que non ei clorada.
Pendent es dies que dure aguesta intervencion, era carretèra d’accès ath Cap dera Vila serà barrada as veïculs, entà poder acabar es trabalhs çò de mès lèu possible.
“Des der Ajuntament consideram fonamentaus es actuacions que s’an d’amiar a tèrme ena aigua de boca des depòsits municipaus. Dempús dera intervencion enes depòsits d’Arròs e Vila, ara començam a trabalhar ena melhora deth depòsit de Vielha”, comente eth còsso d’òbres e servicis de Vielha e Mijaran, Jacint Cuny. E hig que “pendent aguesti pròplèu quate ans, es depòsits son un des objectius principaus qu’auem en govèrn municipau, pr’amor qu’auem de suenhar era salut des nòsti/es vesins/ies”.
Er Ajuntament comencèc est an passat era neteja e melhora des depòsits d’aigua municipaus, pr’amor qu’era màger part hège mès de 15 ans que non s’auien desinfectat. Eth cloro que s’aplique ar aigua enes depòsits provòque eth deteriorament deth sistèma der aigua de boca, e que s’age d’intervier. Ath delà, tanben s’an de revisar es valvules de dubertura des madeishi depòsits.
Pendent aguesta legislatura tanben s’apariaràn es sistèmes de contròl, autant d’emmagazinatge der aigua coma deth cloro, pr’amor que i a depòsits que n’an e d’auti encara non, o se’n placen de naui. Per tant, se preten implementar melhores autant ena captacion der aigua, coma des pròpris depòsits.
16/09/2019