Notícies Veir istoric
Eth Punt Segur dera Hèsta de Vielha aten tres agressions masclistes
Pendent es quate nets que siguec operatiu ath torn de 800 persones demanèren informacion e se balhèc supòrt a 3 denóncies d’agressions masclistes, des quaus ua d’eres acabèc damb un detengut per part des Mossos d’Esquadra
Ua des accions a desvolopar per Ajuntament de Vielha e Mijaran, a trauès deth Plan d’Igualtat d’Oportunitats, a estat eth plaçament d’un Punt Segur (“punt lila”) pendent era Hèsta Major. Er objectiu d’aguest espaci ère eth de balhar informacion sus era violéncia masclista, ath temps que se presentaue coma un punt de sensibilizacion, seguretat, denóncia e confòrt en cas de víuer o presenciar ua agression d’aguest tipe.
Pendent es quate nets que siguec en foncionament, s’i atengueren un totau de tres casi d’agressions masclistes, des quaus ua d’eres acabèc damb un detengut per part des Mossos d’Esquadra. A trauès dera intervencion e actuacion conjunta des membres deth Punt Segur e des diuèrsi còssi de seguretat e vigilància dera Hèsta s’atenguec as agredides.
Deth 7 ath 10 de seteme eth Punt Segur siguec plaçat ena entrada dera Sala de Hèstes, e siguec gestionat per membres dera “Associacion pera Igualtat en Aran”, que compden damb era formacion de besonh, e coordinat damb es Mossos d’Esquadra. Ath delà, es quate nets que siguec en foncionament ath torn d’ues de 800 persones s’apropèren entà conéisher mès prigondament en qué consistís eth Punt Segur.
“Aguesta prumèra experiéncia a evidenciat qu’eth problèma dera violéncia masclista ei tanben present en Aran e que son de besonh accions fèrmes e conjuntes entà eliminar aguesta lacra dera nòsta societat”, afirme eth dusau tinent d’alcalde de Vielha e Mijaran, Alberto López. E hig que “er Ajuntament vò arregraïr a totes es persones n’aguest Punt Segur: membres dera Associacion, còssi de seguretat e Comission de Hèstes”. Atau madeish tanben manifèste que “er Ajuntament trabalhe tanben entà daurir ua collaboracion damb es bars d’òci nocturn tà que se poguen aderir ath protocòl de seguretat contra es violéncies sexuaus en activitats de léser ath quau s’i a aderit recentament eth consistòri”.
18/09/2019