Notícies Veir istoric
Era conferéncia ‘Desafíos mundiales del agua’ de Tony Herrera ena sala Era Audiovisuau
Diuendres 12 de seteme tàs 20 ores
Diuendres que ven 12 de seteme, Tony Herrera, membre dera Fundación Nueva Cultura del Agua (FNCA), realizarà ua conferéncia titolada ‘Desafíos mundiales del agua’ ena sala Era Audiovisuau de Vielha (Val d’Aran) laguens deth projècte ambientau Sud’Eau 2.
Era conferéncia, que començarà entas 20 ores ena anciana sala de cinèma de Vielha, analisarà es principaus ahèrs mondiaus ath torn des vielhs e naui paradigmes sus er auviatge aquatic, en tot aufrir diuèrses solucions ena gestion des conflictes. Jos eth títol ‘Desafíos mundiales del agua’, totes es prepauses dera charrada fomentaràn era sostenibilitat ambientau, economica, sociau e culturau.
Tony Herrera ei biologista e empresari e compde damb experiéncia era ecologia fluviau e restauracion d’arrius. Tanben ei director gerent dera consultoria sus ambient e paisatgisme Mediodes. Ath delà, ei membre dera FNCA, eth Centro Ibérico de Restauración Fluvial e era Asociación Fotográfica Cordobesa.
Era entrada ara conferéncia ei gratuïta e se demore fòrça assisténcia de vesins dera Val d’Aran, a on era aigua ei un auviatge clau laguens deth sòn miei naturau e sòci-economic.
Aguest eveniment se trape laguens deth marc deth projecte Sud’Eau 2 e preten hèr préner consciéncia ara ciutadania sus era importància dera preservacion dera aigua e es arrius.