Notícies Veir istoric
Arrinque ua naua edicion der Espòrt Popular de Vielha e Mijaran, qu’enguan serà gratuït
Aguest activitat ei ua des accions de referéncia a nivèu esportiu der Ajuntament de Vielha e Mijaran, entà fomentar ua vida saludabla a trauès der espòrt
Aguest mes d’octobre s’a encetat ua naua edicion der Espòrt Popular, eth programa d’activitats esportiues qu’er Ajuntament de Vielha e Mijaran, amassa damb eth Conselh Esportiu dera Val d’Aran, amie a tèrme enquiath pròplèu mes de junh en Palai d’Espòrts de Vielha.
Enguan, ei era 3au edicion der Espòrt Popular e, coma nauetat, serà gratuït entàs sòns usatgèrs. Coma ja ei abituau, se pòt gaudir de deluns a dijaus en orari de 19:30 a 21:30. Eth programa ei eth següent: Deluns fotbòl sala, dimars tennis taula, basquet e badminton, dimèrcles fotbòl sala e dijaus vòlei, basquet e badminton.
Pendent es dues prumères edicions, era activitat a enregistrat ua bona participacion, mès enguan, entà acabar de dar un impuls mès a d’aguesta activitat, er Ajuntament a decidit aufrir-la de franc. Ena passada legislatura s’inicièc aguest projècte esportiu coma part deth Plan d’Activitat Fisica d’Espòrt e Salut, damb eth qu’eth consistòri preten fomentar ua vida saludabla ena ciutadania a trauès d’activitats dirigides, en tot practicar diuèrsi espòrts.
Aguesta activitat, amassa damb d’autes coma era Marcha Nordica, que tanben ei ua accion gratuïta impulsada per Ajuntament de Vielha e Mijaran, faciliten era integracion des joeni e des adults, en tot practicar espòrt en un orari que permet era conciliacion familhau.
“Des der Ajuntament volem contunhar en tot fomentar ua vida saludabla dera nòsta gent damb era practica esportiva. Era gratuïtat der Espòrt Popular, atau coma d’autes activitats coma ei era Marcha Nordica, a coma objectiu facilitar er accès des ciutadans ar espòrt, en tot integrar-se ena vida vesiau e garantir eth sòn benèster”, afirme eth dusau tinent d’alcalde e còsso d’espòrts, Alberto López. E hig que “tanben pretenem apropar es installacions esportives municipaus ara gent, entà que les poguen gaudir”.
Er Espòrt Popular serà en marcha enquiath pròplèu 30 de junh. Entà obtier mès informacion sus er Espòrt Popular, o d’autes activitats esportives qu’aufrís er Ajuntament de Vielha e Mijaran, podetz contactar a info@vielha-mijaran.org o en telefòn 973640018.