Notícies Veir istoric
Er Ajuntament de Vielha e Mijaran a acuelhut era presentacion dera 2au edicion deth Job Dating, qu’aurà lòc eth 5 de noveme en Palai d’Espòrts
Aguest eveniment qu’artenhec un gran exit de participacion est an passat, a coma objectiu er escambi entre empreses e trabalhadors dera Val d’Aran entà fomentar contractacions entara sason d’iuèrn
Aguest deluns, era Sala de Plens der Ajuntament de Vielha e Mijaran a acuelhut era presentacion dera dusau edicion deth Job Dating, qu’aurà lòc eth pròplèu 5 de noveme en Palai d’Espòrts de Vielha des 10:00 as 13:00.
Aguest eveniment organizat peth SOC de Vielha, amassa damb eth Grèmi d’Ostalaria dera Val d’Aran e er Ajuntament de Vielha e Mijaran, enguan tanben compde damb era collaboracion deth Conselh Generau d’Aran e er Ajuntament de Naut Aran. Er objectiu ei fomentar er escambi entre empreses e trabalhadors dera Val d’Aran, atau coma de gent arribada de dehòra, entà que se poguen assolidar contractacions laboraus de cara ara sason d’iuèrn que començarà lèu.
Ar acte de presentacion i a assistit eth baile de Vielha e Mijaran, Juan Antonio Serrano, que tanben a participat coma vicesindic dusau e conselhèr d’economia, promocion economica e torisme deth Conselh Generau d’Aran, eth 2au tinent d’alcalde de Vielha e Mijaran, Alberto López, era sosdirectora generau d’ocupacion de Catalunya, Susana Diaz, eth cap deth servei territorial d’ocupació de Lleida, Alt Pirineu i Aran, Joan Santacana, eth director dera oficina deth SOC de Vielha, Jesús Vergés, eth president deth Grèmi d’Ostalaria dera Val d’Aran, Xacobe Bartolomé e eth vicepresident deth Grèmi d’Ostalaria dera Val d’Aran, Juan Antonio Vidal. Atau madeish, an estat presents es diuèrsi responsables des oficines deth SOC dera provincia de Lhèida.
Dempús der exit der an passat, a on mès de 500 persones participèren ena estrea deth Job Dating, enguan s’a ampliat era aufèrta de lòcs de trabalh. I auràn empreses deth sector dera ostalaria, mès tanben deth sector comerciau, pr’amor qu’ena Val d’Aran, eth sector toristic ei fòrça ample, e i a d’auer cabuda entà tot tipe d’empreses. S’aufèrten mès de 200 lòcs de trabalh, en tot auer confirmat era sua preséncia 30 empreses.
Ei important qu’era gent que s’apròpe ath Job Dating ac hèsque damb eth sòn curriculum vitae, pr’amor qu’es empreses poderàn amiar a tèrme entrevistes en madeish Palai d’Espòrts. Mès, entà toti aqueri que non poguen vier ath Job Dating, an ara sua disposicion era direccion de corrèu electronic otg_vielha.soc@gencat.cat entà enviar es curriculum vitae, e eth SOC de Vielha les ac trasladarà as empreses interessades.
“Des der Ajuntament de Vielha e Mijaran demoram qu’aguesta dusau edicion deth Job Dating confirme er exit que ja artenhérem est an passat, a on mès de 500 persones preneren part d’ua iniciativa que beneficie autant a empreses coma trabalhadors, en ua epòca fòrça importanta, coma ei era sason d’iuèrn”, comente eth baile de Vielha e Mijaran, Juan Antonio Serrano. E hig que “enguan s’amplie era aufèrta de places de trabalh, entà que fòrça mès gent de formacion diuèrsa pogue optar a un lòc de trabalh. Demorem que damb es ans, eth Job Dating sigue ua apòsta fixa e segura entà favorir es contractacions laboraus en nòste territòri”.