Notícies Veir istoric
Eth Plen der Ajuntament de Vielha e Mijaran apròve per unanimitat era 4au modificacion de credit deth pressupòst de 2019
Aguesta modificacion, aprovada damb caracter extraordinari, permet iniciar eth pròplèu 4 de noveme es òbres d’emergéncia en un tram dera carretèra d’accès de Vilac a Mont e Montcorbau, que se trape en perilh d’esbauçament
Aguest maitin, eth plen der Ajuntament de Vielha e Mijaran, amassat damb caracter extraordinari, a aprovat per unanimitat des grups politics, er inici immediat des òbres d’emergéncia ena carreterèra de Vilac d’accès a Mont e Montcorbau.
Aguesta intervencion començarà aguest pròplèu 4 de noveme, en tot apariar er estat deth mur que se trape dejós dera cauçada, en pk 0,450 enquia 0,480, entà evitar que s’i pogue produsir beth esbauçament ena carretèra. Er informe tecnic amiat a tèrme pera Diputació de Lleida, a demanda der Ajuntament de Vielha e Mijaran, qualificaue d’urgenta era accion en aguest punt dera via. Ei previst qu’es trabalhs siguen prèsti en quinze dies a compdar deth sòn inici. En sòn finançament, tanben se compde damb era collaboracion deth Conselh Generau d’Aran.
“Des
der Ajuntament amiaram a tèrme aguesta intervencion de manèra
immediata entà qu’aguest tram dera carretèra d’accès a Mont e
Montcorbau sigue prèst abantes dera arribada der iuèrn. D’aguesta
manèra, non i aurà cap perilh de qu’es vesins/es d’aguesti pòbles
demoren isoladi”,
comente eth baile de Vielha e Mijaran, Juan Antonio Serrano.