Notícies Veir istoric
Vielha e Mijaran celèbre eth prumèr Conselh dera Vila dera actuau legislatura
Pendent aguesta session, ena que i a assistit ua ampla representacion dera societat de Vielha e Mijaran, s’a parlat sus era situacion actuau deth Palai de Gèu e sus er augment deth canon de sanejament aplicat pera Generalitat de Catalonha
Pendent eth vèspe d’aguest dimèrcles, s’a celebrat ena Sala de Plens der Ajuntament de Vielha e Mijaran, eth prumèr Conselh dera Vila dera actuau legislatura 2019-2023.
Aguest Conselh ei eth maxim òrgan consultiu e de participacion ciutadana municipau, e compde damb era representacion de desparièrs sectors dera societat entà parlar sus es ahèrs que mès preocupen as vesins e vesies. Eth passat mes de gèr siguec constituït oficiaument, e ei previst que se convòque de manèra periodica, damb ua periodicitat d’ua amassada cada dus/tres mesi, enquia un maxim de sies sessions. Preten establir ua vinculacion dirècta entre era administracion e es vesins e vesies deth municipi.
Un des cambis mès importants a nivèu estructurau, ei eth nomentament d’Alberto López coma nau vicepresident deth Conselh dera Vila. Atau madeish, a nivèu de partits politics, a compdar d’ara, eth grop politic d’Amassa a representacion, dera man d’Estrella Garcia, en detriment de Ciutadans.
Pendent aguesta session, s’a parlat sus dus tèmes fòrça importants. Per un costat, era situacion actuau deth Palai de Gèu, ena que s’a balhat informacion sus era evolucion dera installacion des dera pana ena pista de gèu en mai de 2018, enquiara substitucion d’aguesta pista pera naua pista mobila e, provisionau, arribada de Barcelona gràcies ar acòrd entre es Ajuntaments de Vielha e Mijaran e eth de Barcelona. Ath delà, s’a parlat sus er episòdi des inondacions patides eth passat mes de seteme e sus quin a d’èster eth futur d’aguest equipament, a on era situacion deficitària e es maus estructuraus dera bastissa incremente eth sòn deficit. Atau madeish, des der Ajuntament se trabalharà pendent er an 2020 ena eficiéncia energetica deth Palai entà poder rebaishar era despena, mès damb eth plantejament de cercar naues formules e dotar d’un projècte esportiu que poguen hèr a supervíuer aguesta installacion de cara as pròplèu 15 o 20 ans.
D’aute biais, tanben s’a tractat un ahèr fòrça important coma ei er aigua, en tot remercar era pujada deth canon de sanejament per part dera Agència Catalana de l’Aigua (ACA), a causa deth naut consum que se n’hè en conjunt deth municipi, fòrça viatges maugastada. Ua pujada deth prumèr ath dusau tram impositiu. Se tracte d’un impòst que recapte er Ajuntament mès que va destinat integrament ar ACA. Eth còst deth consum der aigua en Vielha e Mijaran ei gratuït, e sonque se pague peth sòn sanejament e mantenement. Aguesta explicacion ei important, pr’amor que i a agut fòrça brosors de que se crubaue er impòst peth consum der aigua, quan reaument ei peth sòn tractament e sanejament, e eth consum d’agua contunhe en tot èster un servici gratuït entà tota era poblacion.
Atau madeish, tanben s’a balhat compde sus es trabalhs que des der Ajuntament s’amien a tèrme enes desparièrs depòsits d’aigua municipaus, e en hilat d’aigües, que s’esteneràn pendent tota era legislatura, enquia auer deishat en bones condicions era totalitat deth servici d’aigües municipau.
Fin finau, es principaus resolucions acordades en aguesta session son era creacion d’ua comission sus eth Palai de Gèu, entà poder auer, en tot moment, un seguiment sus er estat dera installacion, e, ua dusau comission sus era nhèu, ara qu’era gent pogue accedir entà resòlver quinsevolh dobte o problèma generat pes nheuades.
“Èm fòrça satisfèts pera responsa qu’aguest Conselh dera Vila a enes desparièrs sectors dera societat municipau. Compdam damb fòrça participacion e fòrça interès en trabalhar amassa, administracion e ciutadania, peth benéster deth conjunt de Vielha e Mijaran”, comente eth baile de Vielha e Mijaran e president deth Conselh dera Vila, Juan Antonio Serrano.
03/11/2019