Notícies Veir istoric
Er Ajuntament de Vielha e Mijaran signe un convèni de collaboracion damb era Associacion pera Igualtat en Aran
Enguan, ja s’an començat a dar es prumèri passi damb era creacion deth punt segur ena Hèsta de Vielha, e era consequent formacion ara Comission de Hèstes, e era formacion sus lenguatge sexista as trabalhadors/es der Ajuntament
Er Ajuntament de Vielha e Mijaran e era Associacion pera Igualtat en Aran an signat un convèni de collaboracion, en favor deth foment dera igualtat en municipi.
Eth baile de Vielha e Mijaran, Juan Antonio Serrano, e era responsabla dera Associacion pera Igualtat en Aran, Magda Fraga, an signat aguest acòrd, que permet favorir era realizacion d’activitats que promocionen era igualtat entre hemnes e òmes e era eliminacion d’estereotipes sexistes.
Aguesta collaboracion facilite era aplicacion deth Plan d’Igualtat d’Oportunitats entre Hemnes e Òmes qu’er Ajuntament de Vielha e Mijaran aprovèc est an passat, e qu’era Associacion pera Igualtat en Aran ajudarà a desvolopar damb es diuèrses activitats previstes.
Enguan, ja s’a començat a méter en foncionament aguest Plan, en tot auer organizat diuèrses accions: Per un costat, s’an realizat jornades de formacion as trabalhadors/es der Ajuntament en matèria de lenguatge sexista. D’aute biais, era Associacion pera Igualtat en Aran siguec era responsabla deth punt segur (supòrt as hemnes que patissen agressions sexuaus) pendent era Hèsta Major de Vielha. En aguest sens, era associacion, conjuntament damb es Mossos d’Esquadra, amièren a tèrme era formacion as membres dera Comission des Hèstes sus aguest punt segur, entà saber coma aplicar eth protocòl d’actuacion en cas de presenciar bèra agression sexuau.
“Des der Ajuntament èm fòrça comprometudi en favorir era igualtat d’oportunitats entre es hemnes e es òmes ena nòsta societat, e aguest convèni reafirme aguesta conscienciacion. Enguan, s’an amiat a tèrme diuèrses accions damb era Associacion pera Igualtat en Aran, mès auem de contunhar en tot trabalhar entà garantir era igualtat reau entre sèxes en municipi”, comente eth baile de Vielha e Mijaran, Juan Antonio Serrano.