Notícies Veir istoric
Mès de 250 persones participen en 2au Job Dating celebrat en Palai d’Espòrts de Vielha
Enguan, s’an aufrit mès de 240 lòcs de trabalh, en tot compdar damb ua trentia d’empreses deth territòri
Gran exit de participacion ena 2au edicion deth Job Dating celebrat en Palai d’Espòrts de Vielha, pendent eth maitin d’aguest dimars.
Enguan, mès de 250 persones an passat peth Job Dating en tot cercar trabalh, e tanben fòrça gent a deishat eth sòn Curriculum Vitae directament en corrèu electronic deth SOC, pr’amor que non podien vier ar eveniment. Era organizacion a arremassat mès de 100 Curriculums Vitae de gent que cerque trabalh entà d’aguest iuèrn.
Aguest eveniment ei organizat peth SOC de Vielha amassa damb eth Grèmi d’Ostalaria dera Val d’Aran, e compde damb era collaboracion der Ajuntament de Vielha e Mijaran, e enguan tanben deth Conselh Generau d’Aran. Eth Job Dating preten amassar a empresaris dera Val d’Aran damb trabalhadors de cara ara sason d’iuèrn. Enguan s’aufrie mès de 240 lòcs de trabalh, en tot auer-i participat ua trentia d’empreses deth territòri. Er objectiu principau deth Job Dating ei qu’es trabalhadors poguen auer entrevistes de trabalh, en moment, damb es empreses, en tot liurar eth sòn curriculum vitae, e auer un contacte dirècte.
“Des der Ajuntament balham supòrt ath Job Dating, pr’amor que pensam qu’ei ua grana escasença entà que es empreses e era gent que cerque trabalh poguen auer ua relacion dirècta, en tot realizar entrevistes de trabalh en moment e damb es melhors condicions possibles”, comente eth baile de Vielha e Mijaran e conselhèr de promocion economica dera Val d’Aran, Juan Antonio Serrano. E hig que “un an mès eth Job Dating a estat un exit de participacion. Demorem que fòrça gent age trapat trabalh, e qu’aguest tipe d’eveniment pogue contunhar en tot hèr-se en futur. Ei imprescindible entath mon laborau dera Val d’Aran de cara ar iuèrn, en tot compdar damb es taxes de caumatge mès baishes de Catalonha”.
Vielha e Mijaran siguec pionèr er an passat en Catalonha damb era celebracion deth prumèr Job Dating. Enguan, entà poder saber eth resultat finau d’aguesta dusau edicion, eth SOC ara un seguiment as empreses enquia que comence era sason d’iuèrn, entà saber se s’an cubèrt es lòcs de trabalh aufertades.