Notícies Veir istoric
Vielha e Mijaran torne a acuélher competicions esportives ena naua pista de gèu installada aguest ostiu
Era Copa Vielha de patinatge artistic sus gèu a estat eth prumèr torneig celebrat, coma resultat de mès d’un an de trabalh der Ajuntament de Vielha e Mijaran entà obtier era naua pista provisionau
Eth Palai de Gèu de Vielha torne a acuélher competicions esportives ena naua pista de gèu installada aguest ostiu. Dempús dera pana en mes de mai de 2018, que provoquèc eth tancament dera anteriora pista, er Ajuntament de Vielha e Mijaran artenhec era naua pista provisionau en un acòrd damb er Ajuntament de Barcelona e, ara, mès d’un an dempús de qu’era activitat siguesse arturada, es patinadors pòden tornar a gaudir d’aguest equipament.
Era Copa Vielha celebrada es dies 9 e 10 de noveme, coma prumèra pròva dera Liga Catalana 2019-2020, amassèc a patinadors de Barcelona, Puigcerdà, Andòrra, e es aranesi deth CEGVA.
Precisament, es patinadors locaus aueren ua grana participacion, en tot demostrar es desirs qu’auien de gaudir en casa d’ua naua competicion esportiva. Es pòdiums artenhudi sigueren es següenti: Lucia Sánchez (1èra ena categoria Junior 2au), Irene Aris (1èra ena categoria Intermediate Novice), Dani Odriozola (1èr ena categoria Basic Novice), Berta Feixa (2au ena Basic Novice A), Noa Abad (3au ena Basic Novice A) e Telmo Ripa (2au ena Alevin masculina). Atau madeish, bona actuacion dera rèsta de patinadors: Naia España (4au ena Novice Advance), Sara Luque (5au ena Basic Novice A) e Dana López (5au ena Alevin femenina).
“Des der Ajuntament de Vielha e Mijaran èm fòrça satisfèti de poder tornar a acuélher competicions de patinatge, damb era naua pista de gèu. Era demora a estat longa, talament qu’es negociacions entà auer-la, mès ei un plaser veir as patinadors e as sòns familhars gaudir deth gèu coma auien hèt tostemp”, comente eth baile de Vielha e Mijaran, Juan Antonio Serrano. E hig que “era Copa Vielha a estat sonque eth prumèr pas, ath long dera sason eth Palai de Gèu acuelherà fòrça mès competicions, atau coma as usatgèrs que empleguen era pista a títol individuau, en tot recuperar era normalitat abituau abantes dera pana patida er an passat”.
12/11/2019