Notícies Veir istoric
Eth Centre de Joenessa “Antara” encete un cicle d’activitats que s’amiarà a tèrme pendent cada dissabte
Er objectiu ei fomentar era participacion entre es joeni damb ahèrs sociaus importants entath sòn desvolopament, e que s’alongarà pendent tot eth cors escolar
A compdar d’aguest pròplèu dissabte, eth Centre de Joenessa “Antara” inície un seguit d’activitats que s’amiaràn a tèrme pendent cada dissabte enquiara fin der actuau cors escolar 2019-2020.
Aguestes activitats van dirigides as usatgèrs deth centre qu’an entre 12 e 16 ans. Entath sòn corrècte desvolopament, “Antara” compdarà damb diuèrses dinamizadores, qu’asseguraràn era participacion des adolescents en desparièrs grups.
Peth moment, s’a premanit eth programa d’activitats d’aguest mes de noveme, en tot tractar tres tematiques fòrça importants ena societat actuau.
Per un costat, aguest dissabte 16 de noveme, aguest cicle s’encetarà damb un seguit d’activitats ath torn dera prevencion der alcoòl. Diuendres se commemòre eth dia mondiau sense alcoòl e, per aguest motiu, en aguesta activitat s’amiarà a tèrme ua charrada en tot previer eth sòn consum, atau coma hèr particeps as joeni, en tot collaborar en un talhèr d’elaboracion de coctails sense alcoòl.
D’aute biais, dissabte dia 23 de noveme, eth cicle contunharà en tot tractar era violéncia de genre. Er objectiu d’aguesta activitat ei qu’era joenessa coneishe quina ei era situacion actuau d’aguesta lacra sociau, que malerosament ei fòrça estenuda en Espanha. En aguest sens, se preten conscienciar as joeni/es sus era igualtat de genres, en tot fomentar-la ena vida vidanta. Pendent era activitat, ath delà d’ua charrada, se crearà ua pancarta que serà desplegada pendent era jornada contra era violéncia de genre que se celebrarà eth pròplèu 25 de noveme.
Era darrèra activitat d’aguest mes de noveme ei restacada damb ua malautia vinculada damb es relacions sexuaus, coma ei eth SIDA. Dissabte 30 de noveme, s’amiarà a tèrme ua jornada damb ua charrada, mès tanben damb trabalh e reflexion per part dera joenessa, en tot participar en ua dinamica de creacion dera transmission. D’aguesta manèra, es joeni/es coneisheràn coma se transmet era malautia, e quini son es passi a seguir entà previer-la.
“A compdar d’aguest mes de noveme, des deth centre de joenessa “Antara” iniciam un cicle d’activitats dirigit a qu’es nòsti/es joeni/es siguen particeps d’ahèrs sociaus que les an de servir entath sòn futur. Per aço, aguestes activitats non seràn sonque de vier e escotar, senon que participaràn activament en tot préner consciéncia dera importància de préner decisions ena adolescéncia”, comente eth dusau tinent d’alcalde e còsso de joenessa de Vielha e Mijaran, Alberto López. E hig que “er objectiu ei que pendent tot eth cors escolar i agen activitats entara joenessa sus diuèrses tematiques, uns viatges prepausades pes dinamizadores deth centre, mès tanben d’autes que siguen a prepausa des joeni/es, que son era part interessada”.
14/11/2019