Notícies Veir istoric
Vielha e Mijaran se solidarize damb es afectats deth temporau “Glòria”
Eth plen der Ajuntament mòstre eth sòn supòrt ath conjunt de Catalonha pes damatges patidi era setmana passada
Aguest maitin, er Ajuntament de Vielha e Mijaran, amassat en session ordinària, a mostrat era sua solidaritat damb es afectats deth temporau “Glòria”, que patic ua grana part de Catalonha. Es diuèrsi grups municipaus an mostrat eth sòn supòrt, en tot lamentar es episòdis d’inondacions, a on i auec diuèrsi mòrts e fòrça damatges materiaus.
“Des der Ajuntament de Vielha e Mijaran, mos solidarizam damb es diuèrsi territòris de Catalonha que pendent diuèrsi dies an patit fòrça damatges peth temporau “Glòria”, en tot esténer era man entà tot aquerò que poguen auer de besonh”, comente eth baile de Vielha e Mijaran, Juan Antonio Serrano. E hig que “coma territòri que patirem un episòdi d’inondacions en 2013, comprenem per çò qu’a passat Catalonha aguesti dies”.
Ath delà, eth consistòri tanben a presentat era actualizacion annau der Inventari de Bens der Ajuntament de Vielha e Mijaran, corresponent ath darrèr exercici economic.