Notícies Veir istoric
Vielha acuelherà era Jornada Escolara Intercomarcau eth 28 d’abriu damb lèu 800 alumnes de tota era província de Lhèida
Es alumnes de 6au cors de primària realizaràn activitats esportives e de léser en Palai d’Espòrts e en parcatge public des antigues casèrnes militares
Eth pròplèu 28 d’abriu, Vielha
acuelherà era Jornada Escolara Intercomarcau que s’amie a tèrme cada dus ans en
ua comarca desparièra, damb alumnes de 6au cors de primària. Enguan, eth
Conselh Esportiu dera Val d’Aran organize aguesta jornada amassa damb er INS
d’Aran, en tot recéber lèu 800 alumnes de tota era província.
Es activitats que se
realizaràn son esportives e de léser, en tot concentrar-se en dus punts
concrèts: Eth Palai d’Espòrts, a on se desvoloparàn activitats coma
orientacion, spartan race, jòcs de punteria e zumba entre d’autes, e en
parcatge public des antigues casèrnes militares, damb badminton, tennis taula,
acrosport e jòc collectiu entre d’auti. En totau i aurà 10 estacions, en tot
hèr 20 menutes d’activitat e 5 menutes de descans e cambi d’exercici. Er orari
d’aguestes activitats serà des 10:00 enquias 14:00.
Aguest maitin, er Ajuntament
de Vielha e Mijaran a acuelhut era amassada de coordinacion d’aguesta jornada,
damb preséncia des diuèrses institucions qu’organizen er eveniment, tà premanir
eth corrècte foncionament e desvolopament dera activitat, atau coma era
seguretat des alumnes.
“Èm
contenti de poder recéber ua jornada intercomarcau damb alumnes de tota era
província, mès ath madeish viatge, ei ua responsabilitat importanta, pr’amor
que son lèu 800 escolars, e açò supause auer ua bona coordinacion entre totes
es parts organizadores der eveniment”, comente eth 2au tinent d’alcalde,
Alberto López. E hig que “demorem que
tota era mainadèra que vengue, age ua experiéncia agradiua, e que gaudisque des
activitats premanides”.
03/03/2020