Notícies Veir istoric
Vielha se convertirà en scenari dera sèrie britanica The Crown produsida per Netflix
Ua grana escasença entà promòir internacionaument Vielha e era Val d’Aran, damb ua sèrie qu’enes tres sasons emetudes enquiara, a ua audiéncia de 73 milions de persones en tot eth mon
Pendent aguesta primauera, Vielha se convertirà en part deth rodatge dera famosa sèrie The Crown, produsida per Netflix. Ua grana notícia entà Vielha, pr’amor que parlam d’ua des sèries mès importantes qu’aguesta productora nòrd-americana dispause entre es sues produccions.
Ei previst qu’eth 29 de març, pendent tota era jornada, diuèrsi emplaçaments de Vielha seràn emplegadi entath rodatge d’ua part dera naua sason dera sèrie.
Ara madeish, The Crown compde damb 3 sasons (era darrèra estreada en noveme de 2019), damb un totau de 30 episòdis, en tot èster ua sèrie d’epòca, qu’ei ua biografia deth reinatge dera Reina Isabel II deth Reiaume Unit. Aguesta sèrie, fin finau, se sap que finalizarà damb ua cincau sason.
Laguens de Vielha, era productora a escuelhut era Avenguda deth Solan entà amiar a tèrme eth rodatge. D’aguesta manèra, s’emplegarà es dus sentits d’aguesta avenguda entath rodatge d’exteriors, e er Institut d’Aran entàs interiors. Pendent era filmacion i aurà talhs de transit en aguest carrèr, atau coma era resèrva der espaci entàs veïculs de produccion.
Atau madeish, es equips tecnics dispausaràn d’un airau reservat en parcatge des antigues casèrnes militares entà poder auer es veïculs de produccion e de rodatge entre es dies 27 e 31 de març. Se demore que i age un totau de 200 persones trabalhant pendent eth rodatge, a on i aurà 100 der equip tecnic, 50 der equip de produccion e 50 der equip artistic e de figuracion. Per tant, un desplegament d’equips umans e tecnics fòrça important.
Aguest rodatge supause ua grana escasença entara promocion publicitària de Vielha, pr’amor que parlam d’ua sèrie qu’a ua grana audiéncia. Segontes a confirmat Netflix, The Crown a estat vista per 73 milions d’espectadors en tot eth mon. Sonque ena tresau sason, era audiéncia aumentèc en un 40% respècte ara dusau sason. Per tant, supause assolidar Vielha coma destinacion de montanha de referéncia enes Pirenèus, e ara tanben entà que tot eth mon pogue gaudir deth cap-lòc dera Val d’Aran.
“Entà Vielha, e entath conjunt dera Val d’Aran, ei ua grana notícia er hèt qu’ua sèrie de grana fama e repercusion mondiau coma The Crown, age escuelhut Vielha entath rodatge d’ua part dera següenta sason. Ei ua escasença unica entà que tot eth mon veigue eth gran potenciau que podem aufrir, e ua pòrta a poder acuélher fòrça mès torisme”, comente eth baile de Vielha e Mijaran, Juan Antonio Serrano. E hig que “enquiara mos coneishen, principaument, peth nòste valor naturau des nòsti paisatges, mès tanben podem descatar coma emplaçament entà d’auti airaus coma era produccion cinematografica. Des der Ajuntament de Vielha e Mijaran facilitaram tot çò qu’age de besonh era productora, entà qu’eth rodatge sigue un exit e que Vielha e es nòsti/es vesins/es, siguen satisfèti damb era grana promocion que se’n harà deth pòble”.
Precisament, aguest dijaus, er Hotèl TRYP Vielha acuelhec era celebracion d’un casting dera sèrie, ena que fòrça gent dera Val d’Aran se presentèc entà forma part der equip d’actors dera sèrie.
En conjunt d’aguest rodatge, ath delà de Vielha, Beret tanben serà un aute des scenaris escuelhudi per Netflix entà rodar diuèrses scènes de The Crown.
06/03/2020