Notícies Veir istoric
Er Ajuntament de Vielha e Mijaran pren mesures de prevencion deuant eth Coronavirus e barre totes es installacions municipaus e anulle totes es activitats
S’a constituït un comitè de seguiment municipau, format per equip de govèrn e tecnics deth consistòri, entà survelhar eth seguiment sus era pandèmia e informar des nauetats que vagen apareishent enes pròplèu dies
A compdar d’aguesta tarde, er
Ajuntament de Vielha e Mijaran implemente diuèrses accions entà previer era
expansion deth Coronavirus en municipi, en tot cancellar es activitats e
barrant totes es installacions municipaus, e seguir es recomanacions deth
Govèrn Estatau, Generalitat de Catalunya e Conselh Generau d’Aran.
Enes darrèri dies, s’a
produsit un aument dera alèrta pera proliferacion des casi de contagi e mòrts
en tot eth mon, e en conseqüéncia, era Organizacion Mondiau dera Salut ja a
declarat eth Coronavirus coma pandèmia. De manèra, que s’a constituït un comitè
de seguiment municipau, format per equip de govèrn e tecnics der Ajuntament de
Vielha e Mijaran entà hèr un seguiment dera evolucion dera pandèmia e des
accions que s’an d’amiar a tèrme entà informar ara poblacion e sugerir es
accions concrètes enes espacis publics.
En aguest sens, en tot seguir
es instruccions desvolopades pes administracions publiques, eth consistòri pren
mesures entàs ciutadans/nes que son vigentes, des d’aguesta tarde, e pendent es
pròpleu 15 dies. Cau evitar es aglomeracions de gent e anar entà actes a on i
pogue auer fòrça gent.
Es edats que son en situacion
de risc, e per tant, mès vulnerables deuant dera pandèmia son: menors de 5 ans,
majors de 65 ans, hemnes embarassades, gent damb malauties croniques, malauties
neuromuscolars, e persones inmunodepresives o inmunosupressives. Toti aguesti
son qui aurien d’extremar es precaucions sus es lòcs a on vagen.
En çò que tanh as
installacions municipaus esportives, demoraràn barrades enquiath 31 de març:
Palai de Gèu, Bibliotèca Generau, Cafeteria deth Palai de Gèu, Palai d’Espòrts,
Centre Polivalent, Casau deth Jubilat, Centre de Joenessa, Escòla de Musica, Centre
Associatiu, Era Audivisuau e gessudes de Marcha Nordica.
Atau madeish, se deisharà de
cedir es espacis municipaus entà eveniments recreatius e d’òci (coma pòden
èster es sales sociaus), de manèra que i son includidi toti es pòbles.
Fin finau, e en tot seguir era
instruccion deth departament d’Ensenhament dera Generalitat de Catalunya, toti
es centres educatius tanben barren es pòrtes a compdar de deman diuendres 13 de
març. Per tant, era Escòla Garona de Vielha, era Escòla Mairau “Era Cunhèra” e
er Institut d’Aran.
“Des de Ajuntament seguiram es instruccions que
des deth Ministèri de Sanitat e eth Departament de Salut que vagen desvolopant,
entà esvitar ena mesura que sigue possibla, eth contagi de Coronavirus ena Val
d’Aran”, comente eth baile de Vielha e Mijaran, Juan
Antonio Serrano. E hig que “en tot
moment informaram ara ciutadania sus coma evolucione era situacion, de manèra
que pogam evitar un alarmisme innecesari, pr’amor qu’en tot préner es mesures
avientes, era vida dera gent poderà contunhar damb cèrta normalitat”.
12/03/2020