Notícies Veir istoric
Er Ajuntament de Vielha e Mijaran refortilhe eth servici de desinfeccion municipau damb eth loguèr d’ua naua maquina aigualejadora
Aguest nau aqueriment amplie eth dispositiu de neteja e desinfeccion municipau qu’apliquèc eth Comitè de Crisi municipau eth passat 13 de març, en tot assegurar que tota era via publica demore desinfectada deuant deth COVID-19
Er
Ajuntament de Vielha e Mijaran compde des d’aué damb ua naua maquina entà desinfectar es
espacis publics de tot eth municipi. Ua aigualejadora que servirà entà
refortilhar eth dispositiu de neteja e desinfeccion qu’implementèc
eth Comitè de Crisi en toti es pòbles de Vielha e Mijaran en tot aplicar ipoclorit de sòdi diluït en aigua, segontes es
indicacions deth Ministèri de Sanitat.
Aguesta
naua maquina, a disposicion en regim de loguèr, permet projectar dirèctament
eth producte desinfectant ara via publica, de manèra que se pòt
netejar e desinfectar eth
mobiliari urban e era via publica des deth veïcul. Damb aguesta naua
maquinària, s’amplie eth dispositiu actuau dera brigada municipau, que compde
tanben damb ua escampadora, un veïcul pick up damb
un depòsit d’aigua e netejadores de povàs manuaus damb es que s’assegure poder
netejar e desinfectar es carrèrs mès petiti des pòbles, a on ei
mès dificil actuar.
Er
Ajuntament de Vielha e Mijaran siguec un des pionèrs ena desinfeccion des
espacis publics deuant eth coronavirus, pr’amor que s’activèc eth servici de neteja
abans de decretar-se er estat d’alarma. Ath long des lèu dues setmanes qu’ei en
foncionament, s’a actuat ena via publica de Vielha e dera rèsta de pòbles deth
municipi, en tot hèr enfasi enes entorns sanitaris (residéncia geriatrica,
Espitau Val d’Aran e
farmàcies), atau coma de supermercats e botigues d’alimentacion, ath delà dera
rèsta d’emplaçaments publics. Ath delà, cau rebrembar que non s’a de tocar eth
mobiliari urban, coma mesura de prevencion de contagi de coronavirus,
e seguir es instruccions deth govèrn centrau, de seguir confinadi en
casa, e gésser sonque en carrèr enes casi permetudi.
“Des der Ajuntament contunham en tot refortilhar
eth dispositiu de neteja e desinfeccion dera via publica de tot eth municipi, e
damb aguesta naua aigualejadora, melhoram eth servici qu’aufrim damb era brigada
municipau, a qui li cau arregraïr tot eth trabalh qu’exercís pendent aguesti
dies damb era fin de protegir a toti es ciutadans”, comente
eth baile de Vielha e Mijaran, Juan Antonio Serrano. E ahig que “mentre seguisque en pè er estat
d’alarma, auem de seguir en casa confinadi e gésser en carrèr sonque enes casi
permetudi, en tot èster conscienti qu’era situacion melhorarà se seguim es
instruccions des autoritats sanitàries”.