Notícies Veir istoric
Vielha e Mijaran limite es passejades damb gossets a 100 mètres deth domicili
Damb aguesta naua mesura, sonque poderà gésser a passejar as gossets ua persona en tot realizar un trajècte cuert entà corbir es besonhs fisiologics des animaus
Eth baile de Vielha e Mijaran, Juan Antonio Serrano anóncie qu’a compdar d’aué se regulen es passejades damb gossets en tot eth municipi, coma mesura de prevencion de contagi deth coronavirus COVID-19, dempús de verificar qu’i a quauqui/es ciutadans/nes que realizen aguestes passejades de forma pòc segura.
Damb aguesta mesura, se veten es passejades mès enlà des 100 mètres de distància deth domicili, de manèra que sonque se poderàn realizar trajèctes cuerti e entà corbir es besonhs fisiologics des animaus pendent er estat d’alarma decretat peth Govèrn entà frenar eth coronavirus.
Aguesta accion sonque la poderà amiar a tèrme ua persona, a excepcion des familhes monoparentaus que non pòden deishar as hilhs/es en casa. Cau arrebrembar qu’es passejades damb gossets non son activitats d’òci e, per tant, tanpòc se poderà mantier contacte damb d’auti animaus o persones e s’aurà de mantier ua distància de seguretat en tot moment.
Aqueri/es ciutadans/es que non complisquen damb toti aguesti supòsits seràn denonciadi deuant es autoritats competentes e sancionades cossent damb era nòrma aplicabla.
“Des der Ajuntament auem detectat qu’i a ciutadans/es que profiten era desencusa de trèir as sues mascòtes entà passejar de forma pòc segura, en tot realizar passejades damb gossets en recorreguts fòrça longui e luenh deth sòn domicili en tot méter en risc era salut dera rèsta dera ciutadania”, comente eth baile de Vielha e Mijaran, Juan Antonio Serrano. E ahig que “auem d’èster conscienti deth moment que viuem e dera perilhositat que supause eth possible contagi d’aguest nau virus. Es passejades damb gossets non son activitats d’òci e per açò s’a de limitar a pòqui mètres deth larèr entà corbir unicaments es besonhs fisiologics des mascòtes. Non podem arriscar era nòsta salut, e fòrça mens era dera rèsta dera ciutadania”.