Notícies Veir istoric
Vielha e Mijaran estree un nau sistèma de contròl remòt entà melhorar era gestion des 13 depòsits d’aigua de toti es pòbles deth municipi
Aguest sistèma desvolopat pera enterpresa aranesa Arantec permet disposar d’informacion en temps reau sus eth cabau e era sua clorificacion, entà poder garantir era qualitat dera aigua en tot moment
Er Ajuntament de Vielha e Mijaran a metut en foncionament un nau sistèma de telecontròl des desparièrs depòsits d’aigua que abastissen a toti es pòbles deth municipi, en tot seguir era linha d’accion e compromís per part der equip de govèrn, entà melhorar e garantir un bon subministrament e qualitat dera aigua de boca qu’arribe enes cases de tota era ciutadania.
Aguesta naua iniciatiua, coneishuda coma “Smarty River”, a estat desvolopada pera enterpresa aranesa Arantec, que permet disposar d’informacion monitorizada en temps reau per part deth departament d’òbres e servicis der ajuntament. En aguest sens, permet controlar desparièrs paramètres d’un ben preuat coma ei era aigua, tant ena disponibilitat coma ena qualitat. Aguest contròl remòt aufrís informacion sus era entrada d’aigua procedenta des captacions, atau coma dera gessuda entàs domicilis. D’aute biais, tanben contròle era quantitat de clòro qu’i a ena aigua, entà que se mantengue laguens des paramètres legaus e de seguretat entara salut des persones.
Ath delà, en estat d’alarma que mos trapam, supause ua airina de teletrabalh importanta pr’amor que facilite eth trabalh a distància, damb ua melhora dera gestion deth servici de contròl des depòsits d’aigua.
“Aguest nau sistèma de telecontròl deth comportament des desparièrs depòsits d’aigua de toti es pòbles deth municipi mos permet dar un pas important ena melhora dera gestion e qualitat d’aguest servici public, en tot aplicar era tecnologia de besonh entà poder solucionar quinsevolh tipe de problèma que sorgisque”, comente eth baile de Vielha e Mijaran, Juan Antonio Serrano.