Notícies Veir istoric
Es granes pròves esportiues d’aguest ostiu en Vielha e Mijaran se suspenen e demoren ajornades entar an 2021
Era anullacion des desparières pròves aurà ua pèrta d’ingrèssi en municipi de mès de 3.500.000€ e 30.000 sojorns pendent eth mes de junhsèga
Era
anullacion deth calendari esportiu previst entad aguest ostiu en Vielha e
Mijaran coma conseqüéncia dera crisi deth coronavirus COVID-19 generarà ua nauta pèrta
d’ingrèssi en conjunt deth sector toristic deth municipi. Es pèrtes ocasionades
superaràn es 3.500.000€, dempús dera anullacion de pròves qu’amassaràn a milèrs de participaires e acompanhants. En
aguest sens, i auie previsti mès de 30.000 sojorns entre participaires,
acompanhants e organizadors pendent
eth mes de junhsèga, de manèra qu’er impacte negatiu en sector serà fòrça
significatiu.
Entre
es pròves esportiues mès importantes destaquen: era Val d’Aran by UTMB,
qu’enguan anaue a celebrar era sua prumèra edicion deth 3 ath 5 de junhsèga. Ua trail que
preten plaçar a Vielha e Mijaran
e ath conjunt dera Val d’Aran en
un des circuits de corses Ultra Trail mès
prestigiosi deth mon. Ua auta des pròves que s’an anullat a estat
era Trail Vielha-Molières,
qu’enguan anaue a celebrar era sua 4au edicion. D’auta banda, tanben s’a
anullat era principau competicion de biciclètes, coma ei era Pedals de Foc Non Stop,
qu’enguan anaue a disputar era sua 15au edicion e, que des de 2017, ei eth
Campionat d’Euròpa d’Ultramarathon d’aguesta
modalitat esportiua.
D’autes pròves qu’anauen a celebrar-se aguest
ostiu e que s’an anullat son: Era Ròda Non
Stop, Transpyr Coast to Coast, Bonaigua Gran Fondo
e Vielha Cycling Tour,
ena modalitat de dues arròdes, e es 30 ores de fotbòl sala
Vila de Vielha.
D’aute biais, i a diuèrses pròves que se mantien peth
moment en aguest madeish an. Era Hard Bike, qu’auie de disputar-se iniciaument deth 19 ath 21 de
junh, fin finau s’a ajornat ara dimenjada deth 4 ath 6 de seteme. Deth
temps qu’era Rodi Book,
qu’atrè era preséncia de mès de 800 motoristes en
Vielha e Mijaran, mantierà era data prevista es dies 4 e 5 de seteme.
“Era
crisi que viuem enguan aurà un gran impacte en pèrtes economiques entath sector
toristic damb era anullacion des diuèrses pròves esportiues qu’auíem previstes
entath mes de junhsèga”, comente eth
baile de Vielha e Mijaran, Juan Antonio Serrano. E ahig que “totes es entitats organizadores realizen
un gran trabalh ena promocion e difusion deth nòste municipi e ei d’arregraïr
que pendent eth 2021 mantenguen toti es eveniments entà garantir es ingrèssi
eth pròplèu an”.