Notícies Veir istoric
Er Ajuntament de Vielha e Mijaran planifique es devolucions as usatgèrs/es des corsi e abonaments deth Palai de Gèu que non se poderàn realizar per estat d’alarma
Es devolucions pugen a mès de 45.000€ e se contactarà damb toti es usatgèrs entà poder realizar eth tramit administratiu
Damb er ampliament der estat
d’alarma enquiath mes de mai e era mès qu’improbabla autorizacion de daurir es
centres esportius abans de que concludisque eth calendari des corsi de
natacion, karate, patinatge sus gèu e kickboxing, er Ajuntament de Vielha e
Mijaran a decidit optar pera devolucion dera part proporcionau des sessions que
s’an suspenut coma conseqüéncia dera crisi deth coronavirus.
Per aguest motiu, eth
personau d’atencion ath public deth Palai de Gèu contactarà damb es usatgèrs/es
afectadi/es entà demanar-les es donades bancàries, atau coma es donades
personaus imprescindibles entara tramitacion d’ua devolucion collectiva
qu’afectarà autant ara poblacion infantila coma as adults/es inscriti/es enes
corsi mencionadi anteriorament.
En çò que tanh as
abonaments, se tramitaràn es devolucions des dera data que se barrèc era
installacion, que siguec damb data 12 de març de 2020 e enquiath pròplèu 10 de
mai en tot auer en compde es darrères prorògues der estat d’alarma.
Atau madeish, e pendent eth
periòde qu’a barrat eth Palai de Gèu, des deth consistòri s’a aplicat un plan
de contingéncia energetica, que s’a amiat a tèrme damb era reduccion drastica
enes despenses des desparièrs subministrament dera installacion: enlumenat, climatizacion,
aigua cauda des piscines, desgèu dera pista de gèu, etc, damb er objectiu de
priorizar era viabilitat der equipament, mentre dure er estat d’alarma en
vigor.
“Damb aguesta mesura volem
favorir era liquiditat des familhes en tot retornar uns sòs que paguèren a
principi deth cors esportiu, e que per motius excepcionaus s’a auut d’anullar”, comente eth Baile de
Vielha e Mijaran, Juan Antonio Serrano.