Notícies Veir istoric
Er Ajuntament de Vielha e Mijaran estúdie suspéner era taxa d’aucupacion des terrasses ena via publica
Damb aguesta mesura se preten collaborar ena reactivacion economica dera activitat des sectors dera ostalaria e restauracion deth municipi
Er Ajuntament de Vielha e Mijaran trabalhe ena suspension entar exercici de 2020, dera aplicacion dera taxa pera aucupacion dera via publica pes terrasses des establiments d’ostalaria e restauracion, ua mesura qu’amie en tot estudiar des de hè ues setmanes damb es servicis juridics der Ajuntament e que comuniquèc ath Gremi d’Ostalaria d’Aran eth darrèr dimèrcles 6 de mai.
Er objectiu ei ajudar ara reactivacion dera activitat economica des establiments d’ostalaria e restauracion que tan durament les a afectat era crisi deth Covid-19. Per açò, en pròplèu plen municipau se presentarà entara sua aprobacion era suspension de dita ordenança que durarà enquiara fin der an 2020.
Donques, enguan, non s’aplicaràn es diuèrsi periòdes entà plaçar terrasses ena via publica e toti es establiments les poderàn auer pendent eth temps que desiren, s’aguesti dispòsen dera licéncia municipau corresponenta e respècten es oraris e autes condicions establides ena ordenança reguladora. Atau madeish, se retornarà era part proporcionau dera taxa des de que se declarèc er estat d’alarma ad aqueri establiments que l’auien abonada.
Eth passat 4 de mai entrèc en vigor era fasa 0 de desescalada establida peth govèrn centrau, a on es establiments sonque pòden realizar servicis de liurament en abitança o recuelhuda de comandes pes clients, en tot demorar proïbit eth consum laguens des locaus. Eth pròplèu dia 11 serà quan se harà efectiva era fasa 1. A compdar d’aguest dia es establiments d’ostalaria e restauracion ei previst que poguen daurir es terrasses en tot limitar-se a 50% es taules permetudes er an anterior e en tot mantier era distància de seguretat de 2 mètres entre es taules.
D’auta banda, es establiments auràn d’extremar era igiene damb mesures coma: neteja e desinfeccion der equipament dera terrassa, priorizacion de toalhons d’un solet emplec, dispensadors de gels idroalcoholics entàs clients, foment deth pagament damb targeta de crèdit, e evitar es cartes d’emplec comun.
“Des der Ajuntament volem ajudar ena reactivacion dera activitat economica deth municipi. Per açò portaram ath pròplèu plen era suspension dera taxa der emplec des terrasses ena via publica, entà qu’eth sector dera ostalaria e era restauracion deth municipi redaurissen es sòns negòcis damb es majors facilitats possibles, laguens er estat d’alarma que mos trobam”, comente eth Baile de Vielha e Mijaran, Juan Antonio Serrano, e ahig que “des der inici der estat d’alarma en consistòri trabalham entà minimizar es efèctes economics qu’eth COVID-19 a ena economia, damb era elaboracion d’un Plan de mesures entà ajudar autant as ciutadans coma as desparièrs sectors economics deth municipi”.
08/05/2020