Notícies Veir istoric
Er Ajuntament de Vielha e Mijaran recupère era activitat esportiua deth Palai de Gèu e d’auti equipaments e servicis municipaus dempús de començar era fasa 1 de desescalada
Eth Palai de Gèu poderà utilizar-se damb cèrtes restriccions, atau coma era pista de padel, se reactiven es gessudes de Marcha Nordica, e se daurís era Bibliotèca entara recuelhuda e devolucion de libres
A compdar d’aguest deluns 11 de mai, tornen a
daurir bona part des equipaments esportius de Vielha e Mijaran dempús dera
entrada dera Val d’Aran ena fasa 1 de desescalada, que permet era practica esportiua individuau damb cita
prealabla en centres esportius e installacions ar aire liure, tostemp e quan se
garantís preservar eth distanciament sociau, eth contacte fisic, torns
prèviaments estipuladi, e de sòrta que s’evite era acumulacion de persones.
En aguest sens, er Ajuntament de Vielha e
Mijaran a decidit daurir eth Palai de Gèu damb es mesures restrictives qu’establís
eth govèrn centrau. D’aguesta manèra, se poderà accedir as sales 1,2 e 3, eth
gimnàs, eth rocodròm e era pista de padel damb reserva, en tot trucar ara installacion. Demoraràn
barradi es vestiaris e es piscines qu’an prevista era sua dubertura ena darrèra
fasa dera desescalada.
A compdar der 11 de mai, se poderà demanar cita
prealabla en tot trucar ath telefòn der equipament pendent era madeisha
jornada, o eth dia anterior. Era durada des sessions dera activitat esportiua
non poderà èster superiora a ua ora per usatgèr, a excepcion deth padel, que serà d’ua ora e trenta menutes per session. Es franges oràries abilitades seràn d’ores complètes pendent
er orari de dubertura dera installacion. Er aforament maximal d’ua sala serà d’ua persona,
deth temps qu’en gimnàs depenerà deth nombre de monitors que i age en cada
moment e jamès poderà superar es tres persones. En rocodròm se permeterà ua
persona, deth temps qu’ena pista de padel unicament poderàn èster dues persones.
Ara
installacion sonque poderàn accedir es abonadi e non i aurà venta d’entrades
individuaus, en tot priorizar er accès as persones que dispòsen d’un abonatge
de sason dera installacion. Serà obligatòri entà accedir er emplec de mascaretes,toalha e sabatilhes esportiues de recambi entar accès as espacis esportius. Era mascareta serà obligatòria enes espacis de circulacion e zònes
comunes, era toalha entà plaçar-la sus es maquines, e es sabatilhes de recambi, entà utilizar-les mentre se realize era activitat
fisica.
Pendent er estat d’alarma, er ajuntament a trabalhat
ena readaptacion des
espacis damb ua naua distribucion, e s’aufrissen dues sales entara practica d’spinning, eth gimnàs damb maquines de musculación e cardio, ua sala adaptada de pes liure e ua sala d’exercici aerobic.
Er orari de dubertura deth Palai de Gèu serà de 09:00 a 13:00 e de 15:00 a 22:00, de deluns a
diuendres, e de 10:00 a 14:00 e de 16:30 a 20:30, es dissabtes.
Ath delà, entà poder utilizar era pista de padel, limitada a dues persones, s’aurà de realizar era resèrva prealabla
en centre en tot trucar per telefòn.
D’autra
banda, tanben se reactive era activitat dera Marcha Nordica a compdar deth
pròplèu dissabte 16 de mai. Es gessudes demoraràn limitades a un maximal de
dètz persones, en tot respectar era distància de seguretat de dus mètres entre
es participaires, e serà exclusiu entàs empadronadi en Vielha e Mijaran, qu’auràn de presentar eth
certificat expedit per ajuntament e reservar era gessuda damb eth monitor a
trauès des grops de whatsapp
establidi. A compdar de dissabte, era activitat
contunharà segontes es gessudes programades semanaument, es deluns de 18h a 21h, es dimars e dijaus de 18h a
20h e es dissabtes de 9:30h a 13:30h.
D’autra
banda, eth fronton e er skatepark,
contunharàn barradi pr’amor que non se pòt garantir eth distanciament sociau,
evitar eth contacte fisic pendent eth sòn emplec e aforament, atau e coma
establís era orde ministeriau dera fasa 1.
Cau
remercar, qu’en aguesta naua fasa es equipaments culturaus redaurissen es sues
pòrtes parciauments e tanben se torne a daurir era Bibliotèca Generau de Vielha entara recuelhuda e devolucion de libres, en
orari de 10:00 a 14:00 e de 17:00 a 20:00, de deluns a diuendres. Entà hèr eth prèst se pòt trucar ath telefòn 973640768
e en tot contactar ath corrèu electronic bibliotèca@vielha-mijaran.org.
“Damb
era entrada ena fasa 1 de desescalada, des der ajuntament de Vielha e Mijaran
tornam a daurir es installacions esportiues municipaus, en tot complir damb es
restriccions decretades peth govèrn centrau, de sòrta que se garantisque era igiene e seguretat dera gent qu’accedisque a
realizar quauque tipe d’activitat”,
comente eth baile de Vielha e Mijaran, Juan Antonio Serrano. E ahig que “a mesura qu’es circonstàncies ac permeten,
demoram poder seguir en tot auançar ena dubertura de mès espacis enes pròplèu
setmanes e recuperar era normalitat en toti es equipaments municipaus”.
11/05/2020