Notícies Veir istoric
Vielha e Mijaran suspen eth crubament dera taxa d’aucupacion des terrasses ena via publica enquia acabar er an
Fin finau dempús d’estudiar diuerses mesures entara reactivacion economica deth sector toristic en municipi, se suspen era taxa de terrasses per decrèt d’alcaldia en tot aleugerir era sua carga tributària
Eth
baile der Ajuntament de Vielha e Mijaran, Juan Antonio Serrano, a hèt efectiu
un decrèt mejançant eth qu’a decidit suspéner eth crubament dera taxa pera
aucupacion des terrasses, enquia acabar er an. Aguesta mesura tanben contemple
era ampliacion deth periode de dubertura pendent er an 2020.
Damb aguesta
accion er Equip de Govèrn preten ajudar ath sector toristic e aleugerir era
carga tributària as establiments ostalèrs e de restauracion en un moment fòrça
complicat entara economia de Vielha e Mijaran, coma conseqüéncia dera crisi
sanitària derivada dera Covid-19. En aguest sens, se tracte d’un impuls entara
reactivacion economica graduau deth municipi, en estat d’alarma vigent. Tanben
se trebalhe en d’autes accions qu’ajuden a d’auti grèmis deth sector de
servicis, motor economic principau deth nòste territòri.
“En tot trapar-mos en un moment complicat entara economia
de Vielha e Mijaran, coma conseqüéncia dera crisi sanitària causada pera
Covid-19, ei de besonh qu’er Ajuntament implemente aguesta mesura, entà
aleugerir era carga tributària as contribuables, en benefici dera reactivacion
economica deth municipi”, comente eth baile de Vielha e Mijaran, Juan Antonio Serrano”. E
ahig que “pòc a pòc tornaram ara normalitat, e eth nòste compromís
d’ajudar autant as ciutadans coma as sectors economics mos pòrte a collaborar
en tot çò que sigue possible entà redusir er impacte qu’aguesta crisi provòque
ena nòsta vida vidanta”.