Notícies Veir istoric
Vielha e Mijaran auance ena dubertura des sòns servicis publics ena desescalada dera fasa 2
Eth Palai de Gèu daurís es piscines entar usatge esportiu damb limitacions e era Bibliotèca Generau de Vielha aufrís eth servici deth punt de lectura e estudi ena installacion damb un aforament deth 30%
Eth Palai de Gèu torne a daurir es piscines
interiores damb cèrtes limitacions, damb era entrada dera Val d’Aran ena fasa 2
de desescalada. Damb aguesta dubertura parciau, se permet ua persona per cada
carrèr d’entrenament ena piscina grana e un totau de quate persones ath viatge
en vas complementari. Entà reservar torn enes piscines calerà demanar cita
prèvia en telèfon 973642864, e sonque serà disponible entàs abonats.
De deluns a diuendres, er orari d’emplec peth
maitin serà de 9 a 10 e de 11 a 12, e pera tarde de 15 a 16, de 17 a 18, de 19
a 20 e de 21 a 22. Es dissabtes er orari serà de 12 a 13, de 16:30 a 17:30, e
de 18:30 a 19:30. Per tant, er emplec maxim dera piscina per persona serà de ua
ora, en tot deishar marge entà netejar e desinfectar es piscines. Serà
obligatòri er usatge deth casquet de banh e des chancletes, e toti es objèctes
personaus s’auràn de mantier en un perimètre de distància de 2 mètres de
seguretat, en tot evitar eth contacte damb era rèsta d’usatgèrs.
Atau madeish, se poderàn emplegar es vestiaris
pendent eth temps que dure cada torn, e es 20 menutes posteriores ara sua finalizacion.
Un viatge acabat aguest temps non se i poirà accedir, pr’amor que se procedirà
ara neteja e desinfección der espaci.
Cau rebrembar, qu’ei obligatòri er emplec dera
mascareta enes espacis comuns deth Palai de Gèu e tanben en moment de demanar e
tornar es claus dera pista de padel e fronton.
Ath delà, tanben s’amplie er espaci abilitat ena
Bibliotèca Generau de Vielha. A compdar d’ara, se poderàn emplegar es punts de
lectura a un tèrç dera sua capacitat. Calerà demanar cita prèvia e eth temps
serà limitat. Atau madeish, era sala d’accès a wifi serà d’un maxim d’ua ora.
De moment, era seccion infantila demorarà barrada, e tanpòc i aurà premsa, per
motius de seguretat.