Notícies Veir istoric
Er Ajuntament de Vielha e Mijaran apròve era dusau modificacion de credit que permeterà ajudar a paliar es efèctes dera crisi sanitària dera COVID-19
A compdar der acòrd prenut damb eth Conselh Generau d’Aran e d’auti ajuntaments municipaus, eth consistòri met a disposicion recorsi economics tà ajudar ara ciutadania a hèr front ara situacion economica actuau
Aguest maitin, eth plen der Ajuntament de Vielha
e Mijaran, amassat en session ordinària, a aprovat era dusau modificacion de
credit deth pressupòst municipau d’enguan, que includís fòrça mesures
destinades a ajudar as familhes e sectors economics deuant es efèctes originadi
pera crisi sanitària dera COVID19.
En aguesta modificacion se contemplen mesures de
supòrt as familhes, a trauès de productes d’ajuda sociau, coma son es bancs
d’aliments e es subvencions destinades as béns. Atau madeish, tanben s’aufrís
ajuda as PYMES (petites e miejanes empreses) deth municipi, atau coma era
implementacion de mesures de foment deth trebalh public a compdar de plans
aucupacionaus, damb era generacion de lèu 40 lòcs de trebalh.
Ath delà, tanben s’a modificat eth credit entà
justificar es despenes originades en foncionament der Ajuntament des dera
declaracion der estat d’alarma, damb eth plan de desinfeccion des carrèrs de
toti es pòbles deth municipi, es equipaments de proteccion individuau (EPI), e
eth loguèr d’ua mashina aigualejadora, entre d’auti.
Tanben s’a incrementat era partida destinada as
EMD d’Arròs e Vila e era d’Escunhau e Casarilh, entà que poguen desvolopar
òbres de melhora deth servici de parcatge enes pòbles.
D’aute biais s’a aprovat era inversion en depòsit
d’aigua de Vielha, qu’ei fòrça de besonh, deuant er estat maumerenc d’aguest
equipament municipau, que s’aurà d’apariar ena sua totalitat, autant en
interior, coma en exterior, e en tot intervier ena valvula. Ua accion que
seguís damb eth compliment dera promesa electorau der equip de govèrn d’Unitat
d’Aran, de mantier e melhorar er estat de tot eth hilat de depòsits d’aigües
municipaus pendent tota aguesta legislatura.
Eth plen tanben a aprovat ua mocion de supòrt as
alumnes aranesi qu’an de realizar es PAU (Pròva d’Accès ara Universitat), entà
demanar qu’aguesta pròva se pogue desvolopar ena Val d’Aran, pr’amor dera nauta
despena que supause entàs estudiants d’anar a hèr-les en Lhèida pendent diuèrsi
dies, atau coma evitar eth risc de contagi dera COVID-19. Atau madeish, tanben
se balhe supòrt ara demana des estudiants de poder realizar es pròves de grad miei
e superior tanben ena Val d’Aran.
“Damb
aguesta modificacion de credit, er Ajuntament de Vielha e Mijaran contunhe en
tot ajudar as familhes e as empreses deth municipi, en un moment fòrça
complicat arraïtz dera crisi sanitària dera COVID-19 e dera crisi economica que
se generarà entàs pròplèu ans”, comente eth baile de Vielha e Mijaran, Juan
Antonio Serrano. E hig que “en
consistòri seguim en tot apostar per ajudar a toti/es aqueri/eres qu’ac agen de
besonh, e laguens des nòstes possibilitats, sajaram d’èster ath sòn costat entà
atier es sues demanes”.