Notícies Veir istoric
Er Ajuntament de Vielha e Mijaran cerque solucions amassa damb eth Grèmi d’Ostalaria dera Val d’Aran deuant era manca de mesures de seguretat qu’an sorgit en quauques terrasses deth municipi
Enes darrèri dies, s’a metut en risc era salut publica en tot èster denonciat per vesins, Grèmi d’Ostalaria e eth pròpri Ajuntament pera situacion de quauques terrasses de Vielha, a on s’a verificat era manca de mesures de seguretat
Era
darrèra setmana es Mossos d’Esquadra amassa damb es Agents Municipaus inicièren
ua campanha informativa entà dar a conéisher as diuèrsi establiments
d’ostalaria qu’an daurit ath public pendent era fasa 1 e 2 der estat d’alarma,
es condicions de dubertura des terrasses, que se limite per Orde Ministeriau ath
50% dera aucupacion de taules e cagires dera licéncia municipau der an 2019.
Se
verifiquèc que quauqui establiments variauen pendent era jornada eth nombre de
taules e cagires en tot incrementar er aforament as madeishi nivèus que pendent er an
anterior, sense respectar era distancia de seguretat interpersonau e qu’es
clients siguessen seigudi.
Enes
darrèri dies s’an arrecebut reïterades quèishes per part dera ciutadania e deth
pròpri Grèmi d’Ostalaria, sus es condicions que se genèren en quauques terrasses, en tot auer
dat avís per part der Ajuntament as Mossos d’Esquadra en tot alertar era manca de mesures se seguretat
front ara COVID-19, donques que son es responsables de hèr complir es Ordes
Ministeriaus.
Er
Ajuntament de Vielha e Mijaran e eth Grèmi d’Ostalaria dera Val d’Aran contunhen en tot trabalhar entà promòir mesures que
favorisquen era progressiua reactivacion economica deth municipi e que garantisquen
era distància minima de seguretat interpersonau. En aguest sens, pendent era
darrèra amassada, s’a acordat era creacion d’un Comitè de trabalh, format ena
sua majoria per tecnicians der Ajuntament, un membre dera equipa de govèrn, dus
membres deth Grèmi d’Ostalaria, e un representant deth Conselh dera
Vila coma maxim organ de
participacion ciutadana municipau, que servirà tà deliberar sus era installacion e aplicacion des
terrasses en municipi. Es sollicituds s’auràn de realizar de manèra individuau
per part des interessadi a trauès dera sedença electronica municipau o de
manèra presenciau, en tot demanar cita prèvia, entà estudiar cada cas en
foncion des caracteristiques dera zòna e accessibilitat, en tot auer en compde
aspèctes tecnics e legaus.
Aguest tipe de tramit non ei nau, donques qu’es
peticions des terrasses s’an de formalizar cada an entà sollicitar era
preceptiva licéncia municipau,
damb es requisits establidi ena ordenança reguladora a on s’a de presentar
instància e plan ena peticion.
Er
objectiu ei minimizar es efèctes qu’era COVID-19 genère ena economia, e en tot favorir que
se pogue garantir era seguretat interpersonau e
eth contròl der aforament des
establiments. “Enes darrèri dies auem
verificat grèus problèmes en compliment des mesures de seguretat front ara COVID-19 que
mos pòden hèr anar entà darrèr en aguest procès de desescalada que preten retornar-mos a ua naua
normalitat e a on er emparament dera salut publica ei çò de mès important, en
tot complir damb es nòrmes qu’es autoritats sanitàries apliquen pendent aguesta
situacion excepcionau”,
comente eth Baile de Vielha e Mijaran, Juan Antonio Serrano. E ahig que “er Ajuntament vò esténer era man ath
sector en tot collaborar damb accions que favorisquen era reactivacion economica
damb totau seguretat en Vielha e Mijaran, a mesura qu’auance era desescalada der estat d’alarma en vigor.”
01/06/2020