Notícies Veir istoric
Era Escòla Mairau “Era Cunhèra” daurís es sues pòrtes eth 18 de junh
Eth centre acuelherà as alumnes de P0, P1 e P2, en orari de 9 as 13 ores, des pairs/mairs qu’ac solliciten per non poder conciliar era vida familhar damb era professionau
A compdar deth pròplèu dijaus 18 de junh, era Escòla Mairau “Era Cunhèra” de Vielha torne a daurir es sues pòrtes, dempús de qu’es autoritats competentes permeten era sua dubertura a compdar dera fasa 2 de desescalada, entà d’aqueri/aqueres pairs/mairs des alumnes que non pòden conciliar era vida familhar e era professionau.
En
aguest sens, i poiràn anar es alumnes de P0, P1 e P2, s’es
pairs/mairs ac solliciten en tot presentar ua declaracion responsabla
e un certificat d’empresa, en tot èster un retorn progressiu
pendent es mesi de junh e junhsèga.
Entà d’aguesta dubertura, era Escòla Mairau abilitarà un totau de cinc aules, enes quaus, en tot préner es mesures de seguretat avientes, se permeterà er accès a un maxim de cinc alumnes per aula (instruccion establida peth Departament d’Educació dera Generalitat de Catalunya), en tot assumir un maxim de vint-e-cinc alumnes en centre. Ei de besonh remercar qu’era distribucion des alumnes se realizarà per edat e non per an de neishement, precisament entà non superar era ràtio establida.
Tot
eth personau educatiu dera Escòla Mairau serà
disponible a compdar deth 18 de junh: 3 mèstres, 3 tecnics e 2
auxiliars. Tanben i aurà un servici extra deth personau de neteja
des 10:30 as 11:30 cada dia entà garantir era corrècta desinfeccion
des aules.
En tot moment, des deth centre se mantieràn un seguit de normes de seguretat e d’igiene entath sòn optim desvolopament. En aguest sens, es alumnes se traparàn en espacis de 4m2 cadun, en tot evitar es espacis compartidi, es cambis d’aula e es desplaçaments per interior deth centre.
I auràn espacis abilitadi entà qu’es pairs/mairs poguen amiar a tèrme es besonhs avienti damb es sòns/sues hilhs/es (chuquetes, borrasetes, etc.).
En tot cas, queden suspenudes totes es activitats que supausen gésser deth centre escolar, en tot favorir es que s’amien a tèrme ena escòla (condes, dances, etc), enes qu’es alumnes poguen auer eth sòn pròpi materiau, sense auer-lo de compartir.