Notícies Veir istoric
Vielha e Mijaran suspen toti es actes multitudinaris des hèstes majors, romieuatges, revelhes e d’autes celebracions hestiues populars e culturaus
Damb aguesta decision acordada per Ajuntament de Vielha e Mijaran damb era rèsta de pòbles deth municipi, se preten evitar eth risc de contagi dera COVID-19 deuant era possibilitat d’un repunt dera pandémia pendent es pròplèu mesi
Er
Ajuntament de Vielha e Mijaran, amassa damb toti es pòbles deth
municipi, a decidit suspéner toti es actes multitudinaris des hèstes
majors, romieuatges, revelhes e d’autes celebracions hestiues de toti
es pòbles deth municipi entà evitar aglomeracions e possibles
contagis.
Aguesta ei ua decision que preten evitar es possibilitats d’un nau repunt dera COVID-19 de cara ar ostiu e, sustot, entara tardor, qu’ei quan se demore que i age mès probabilitats d’ua dusau ondada d’aguesta pandémia, segontes estimen es autoritats espanhòles, atau coma era Organizacion Mondiau dera Salut, e que poderie èster fòrça mès agressiua qu’era actuau.
En aguest sens, suspéner tot tipe de hèstes a estat ua decision consensuada entà evitar que se pogue agropar fòrça gent enes actes hestius, sense poder auer un contròl absolut des normes de seguretat e igiene establides. D’aguesta manèra, ei melhor previer quinsevolh risc, dempús der exit artenhut enquiara, a on era Val d’Aran a estat des zònes de tot er Estat que mès rapidament a podut auançar ena desescalada der estat d’alarma gràcies ath bon comportament generau dera poblacion.
A despièch d’aguesta anullacion de toti es actes hestius e culturaus, des deth consistòri s’estúdie era possibilitat de veir coma auancen es dies entà poder programar quauqua activitat a on se pogue assegurar un cèrt contròl des aglomeracions damb seguretat, sense que i age cap tipe de risc de contagi, e d’aguesta forma poder celebrar aumens era hèsta patronau de cada pòble.
“Des der Ajuntament de Vielha e Mijaran, damb es presidents des EMD, lamentam prigondament auer de préner aguesta decision de suspéner es diuèrses hèstes que i a en municipi, mès credem, ath madeish viatge, qu’ei çò de mès avient deuant era nauta possibilitat d’un nau repunt dera COVID-19 enes pròplèu mesi”, comente eth dusau tinent d’alcalde e còsso de hèstes de Vielha e Mijaran, Alberto López.
16/06/2020