Notícies Veir istoric
Vielha e Mijaran recupère es sessions de cinèma en Era Audiovisuau a compdar der 1 d’agost
Era collaboracion der Ajuntament de Vielha e Mijaran damb eth Circuit Urgellenc permet tornar a daurir aguest equipament municipau damb cèrtes mesures de seguretat entà previer eth contagi dera COVID-19
Eth pròplèu dissabte 1 d’agost, era Sala Era Audiovisuau de Vielha torne
a daurir es sues pòrtes, damb era recuperacion des sessions de cinèma, dempús
de mès de quate mesi barrada pera crisi sanitària dera COVID-19.
Pendent tot aguest temps, er Ajuntament de Vielha e Mijaran e eth Circuit
Urgellenc an trabalhat fòrça entà poder recuperar aguest equipament culturau
municipau deth quau s’en beneficie tota era Val d’Aran e es visitaires. Se
torne a daurir en tot priorizar era seguretat des sòns usatgèrs, damb era
aplicacion des mesures vigentes aué dia. En aguest sens, a compdar d’ara s’aurà
de deishar era distància de seguretat d’1,5 mètres entre es cagires dera sala,
de manèra qu’era capacitat totau serà ath torn d’un tèrç per session. Era
excepcion serà entàs membres d’ua madeisha familha que òc que poiràn setiar-se
amassa. Ath delà, tanben serà obligatòri er emplec dera mascarèta pendent era
projeccion des pellicules.
Ua des nauetats positives ei que i aurà un prètz unic
entà totes es sessions, en tot auer-i ua rebaisha considerabla enes entrades. A
compdar d’ara, totes es sessions costaràn 5,90€, en tot auer amendrit 1€ eth
prètz qu’auien abantes dera aparicion dera pandémia. Er objectiu ei favorir que
toti/es poguen gaudir deth cinèma ath madeish prètz, en un moment economic
difícil. I aurà ua session per dia, ara madeisha ora, en tot demorar amplià’c
se tot auance peth bon camin. Ath delà, gràcies ara sua dubertura, se favorís
era recuperacion de diuèrsi lòcs de trabalh, que pendent toti aguesti mesi
s’auien acuelhut a un ERTE.
Era decision de daurir a estat fòrça pensada tanben,
pr’amor qu’era indústria deth cinèma a estat tanplan arturada, e non i auie
guaires estrees de pellicules. Ara, damb era naua normalitat, se torne a
iniciar era projeccion des films previsti entà enguan e, per tant, ara ei un
bon moment entara sua projeccion en Era Audiovisuau de Vielha.
“Entà Vielha e Mijaran e
tota era Val d’Aran, era dubertura de Era Audiovisuau ei ua grana e demorada
notícia, pr’amor qu’ei eth principau equipament culturau municipau, que compde
damb fòrça istòria, e toti desirauem poder tornar a gaudir des sues projeccions”, comente eth baile de Vielha e Mijaran, Juan Antonio
Serrano. E hig que “s’a adaptat era
installacion as mesures de seguretat vigentes pera COVID-19 e, per tant, demanam
as usatgèrs que siguen conscients der esfòrç que s’a hèt entà daurir-la, e que
suenhen de mantier-la enes melhores condicions possibles, en tot respectar es
sues normes. Tanben demoram que non i agen mès rebròts pera pandémia, e que se
pogue mantier dubèrta”.
30/07/2020