Notícies Veir istoric
Era Escòla Mairau “Era Cunhèra” barre era linha de P2 per un positiu en professorat
Es escolans des classes de P2 e eth sòn professorat adscrit, demoraràn en isolament domiciliari pendent 14 dies e se les realizaràn es pròves PCR, e aguest barrament non afècte as linhes de P1 e P0
Dempús de conéisher ager pera tarde eth positiu d’un membre deth professorat dera linha de P2, es responsables deth Servei de Vigilància Epidemiològica deth Departament de Salut dera Generalitat an instat a barrar de forma preventiva aguesta linha de P2, en tot seguir damb es protocòus establidi tad aguesti casi.
Atau donc, es escolans e eth sòn professorat, un totau de quate professionaus e 29 mainatges e mainades, demoraràn isoladi enes sòns domicilis e enes pròplèu dies se les realizarà era pròva PCR. Atau madeish, er Espitau Val d’Aran a contactat damb cadua des familhes entà coordinar e balhar-les era informacion de besonh.
Era Escòla Mairau “Era Cunhèra” compde damb un totau de 4 classes dubèrtes actuaument entre es corsi de P1 (24 escolans) e P2 (29 escolans), mès er isolament afècte sonque ath cors de P2, gràcies as mesures e protocòus establidi entà desseparar es corsi e eth professorat e, pes quaus, entre d’autes mesures, cada cors entre en centre per lòcs diferents e non se crotzen ne barregen enes activitats qu’amien a tèrme.
Aguesta dimenjada er Ajuntament de Vielha e Mijaran a procedit ara desinfeccion e neteja dera Escòla entà que deluns sigue en perfèctes condicions entara rèsta d’escolans.
19/09/2020