Notícies Veir istoric
Er Ajuntament de Vielha e Mijaran inície es trabalhs de reabilitacion deth depòsit d’aigua de Vielha
Damb un pressupòst de 141.000€, s’amie a tèrme prètzhèts de renfortiment dera estructura, en tot impermeabilizar-la entà eliminar pèrtes d’aigua e filtracions, e cambiar es vàlvules, qu’èren vielhes
Pendent
aguesta setmana, er Ajuntament de Vielha e Mijaran a iniciat es trabalhs de
reabilitacion deth depòsit d’aigua de Vielha, qu’aufrís servici entàs nuclèus
urbans de Vielha e Betren.
Aguesta intervencion, qu’ei previst que dure uns dus mesi,
compòrte un seguit de prètzhèts autant ena part exteriora coma interiora. Eth
depòsit hè fòrça ans qu’ei hèt e que foncione sense auer patit cap remodelacion
e, per tant, auie de besonh ua accion urgenta, en tant que s’auie quedat
obsolet. En aguest sens, s’amiarà a tèrme un renfortiment estructurau deth
hormigon deth depòsit, en tot impermeabilizar-lo, pr’amor que patie fòrça
pèrtes d’aigua com a conseqüéncia de fòrça filtracions. Atau madeish, tanben se
procedirà ath cambi des valvules, que ja èren vielhes. Tota era intervencion
compde damb un pressupòst de 141.000€.
Entà començar, s’a realizat eth sòn uedatge, e se realizarà ua
neteja complèta, pr’amor qu’aguest depòsit d’aigua ei fòrça vielh e a de besonh
ua intervencion prigonda. Atau madeish, un viatge sigue prèst, s’aurà de
contunhar en tot hèr un mantenement periodic, pr’amor que se trape en un parçan
perilhós e s’aurà de suenhar entà assegurar un abastiment corrècte.
24/09/2020