Notícies Veir istoric
Er Ajuntament de Vielha e Mijaran daurís era convocatòria entà sollicitar ajudes ath comèrç, petites e mejanes empreses e autonòms deth municipi afectadi pera COVID-19
Eth consistòri establís ua partida de 50.000€ entath pagament dera despena de materiaus e EPIS de proteccion dera pandémia, qu’aueren d’aquerir dempús der estat d’alarma
Er Ajuntament de Vielha e Mijaran aufrís ua linha d’ajudes as PIMES e autonòms deth municipi entà ajudar-les a paliar es despenes qu’an agut de sufragar com a consequéncia dera aparicion dera COVID-19.
En aguest sens, eth consistòri a daurit era convocatòria entà qu’es PIMES (de mens de 20 trabalhadors) e autonòms qu’agen era sua activitat empresariau en Vielha e Mijaran, poguen demanar ua subvencion entà ajudar en pagament de materiaus e EPIS de proteccion deuant dera pandémia, qu’aueren de crompar dempús der estat d’alarma.
Eth periòde imputable ei deth 14 de març ath 30 de junh de 2020, en tot concedir-se sonque ua ajuda per sollicitant. Era quantitat dera subvencion autrejada serà deth 50% der impòrt des factures enquia un maxim de 400€.
Tota era informacion entà poder sollicitar era ajuda, atau coma eth formulari e era justificacion, son plaçadi ena plana web der Ajuntament de Vielha e Mijaran e se poderà presentar en registre der Ajuntament presenciaument en tot demanar ora en telefònn 973640018 o pera sedença electronica https://vielha-mijaran.eadministracio.cat.
Es sollicitants dispausen d’un totau de quinze dies abils dempús dera sua publicacion en Bulletín Oficiau dera Provincia de Lhèida entà presentar es sollicituds d’ajuda.
Aguesta partida s’includís laguens des 119.500€ qu’eth consistòri non a invertit enguan enes hèstes majors deth municipi e der airau de cultura, e que se destinen a ajudar as familhes e negòcis que patissen es efèctes dirèctes dera crisi economica generada a compdar dera crisi sanitària dera COVID-19.