Notícies Veir istoric
Es installacions municipaus de Vielha e Mijaran barraràn entàs 21 ores, en tot adaptar-se ath tòc de queda establit pera Generalitat entàs pròplèu 15 dies
Eth Palai de Gèu ampliarà er orari de maitin enquias 14 ores, Era Audiovisuau auance as 19:15 era session de cinèma des deluns “Dia der Espectador”, mentre qu’es parcs infantils de tot eth municipi se poderàn emplegar enquias 20 ores
Damb era declaracion d’aguest dimenge deth tòc de queda des 22 as 06 ores per part dera Generalitat de Catalunya, emparat en nau estat d’alarma decretat peth govèrn centrau entà contier es bròts dera COVID-19, a compdar d’aguest deluns es installacions municipaus de Vielha e Mijaran barraràn es sues pòrtes ath public entàs 21 ores, entà favorir qu’autant usatgèrs coma trabalhadors poguen arribar en casa abantes de superar er inici deth tòc de queda.
Entà poder compensar er auanç d’aguest barrament, eth Palai de Gèu ampliarà er orari de dubertura dera installacion peth maitin enquias 14 ores, en lòc des 13 ores coma ère abituau enquiara.
D’aute biais, es parcs infantils des diuèrsi pòbles barraràn es sues pòrtes entàs 20 ores, mentre qu’Era Audiovisuau de Vielha auançarà era session des deluns “Dia der Espectador” as 19:15, entà non incomplir damb era ora limit der inici deth tòc de queda, en tot mantier er aforament limitat.
Atau madeish, es establiments dauridi ath public auràn de barrar entàs 21 ores, exceptat des activitats culturaus, que mantieràn eth barrament maxim entàs 22 ores.
Era nauta preséncia deth COVID-19 en carrèr a obligat as autoritats a establir aguestes naues mesures, de manèra qu’ei responsabilitat de toti/es seguir es directritzes vigentes entà esvitar eth risc de contagi ena nòsta vida vidanta. En aguest sens, cau rebrembar que son limitades es amassades a un maxim de 6 persones, qu’ei obligatòri er emplec dera masqueta entàs majors de 6 ans, que cau lauar-se es mans soent, e desinfectar e netejar es espacis e es objèctes, cau mantier era distància de seguretat, atau coma non compartir objèctes.
“Mos trapam ena dusau ondada dera pandémia, que comence a auer chifres fòrça anautes de contagis. Per açò, ei important préner consciéncia dera importància de previer eth risc de contagi, e des der Ajuntament, en tot seguir es normatives des autoritats competentes, adaptam es installacions municipaus as naues directritzes establides damb er estat d’alarma e eth tòc de queda”, comente eth baile de Vielha e Mijaran, Juan Antonio Serrano. E hig que “ei de besonh que toti/es sigam responsables, pr’amor que mos i jogam fòrça enes pròplèu mesi. Coma societat auem d’èster amassa, entà esvitar mesures mès dures e conseqüéncies sanitàries e economiques pejores des qu’auem ara. Sonque amassa mo’n gesseram”.
26/10/2020