Notícies Veir istoric
Demoren barradi pendent 15 dies es equipaments municipaus, atau coma era realizacion d’activitats extraescolares, esportives e culturaus entà lutar contra era dusau ondada dera COVID-19
Era Generalitat a prenut un seguit de mesures entà frenar era expansion dera pandémia, a on tanben s’includís eth confinament perimetrau des municipis damb limitacion dera mobilitat pendent es dimenjades
A compdar d’aguest diuendres, 30 d’octobre, entre en vigor eth nau paquet de mesures qu’eth Govèrn dera Generalitat de Catalunya a aprovat aué entà lutar contra era expansion dera dusau ondada dera COVID-19, e que s’aplicarà pendent es pròplèu 15 dies.
En çò que tanh ara afectacion municipau, a compdar de deman demoraràn barradi es diuèrsi equipaments esportius municipaus (Palai de Gèu, Centre Polivalent e Palai d’Espòrts), atau coma era totalitat dera sua activitat, autant per liure coma dirigida. Atau madeish, tanben s’arture era activitat ena Sala Era Audiovisuau de Vielha pendent tot aguest periòde de temps. Era Bibliotèca Generau de Vielha contunharà dubèrta en sòn orari abituau, mès sonque entath servici de prèst.
En airau d’ensenhament, demorarà arturat eth desvolopament abituau des activitats extraescolares enes centres educatius. Era formacion academica abituau ena Escòla Mairau “Era Cunhèra”, era Educacion Primària (presenciau) ena Escòla Garona, atau coma enes diuèrses modalitats qu’aufrís er INS d’Aran (ibrida, combinacion entre era formacion presenciau e a distància) seguiràn en foncionament.
Enes parcs infantils, se mantierà era possibilitat d’emplegar-les pera mainadèra enquias 20 ores coma ère previst actuaument.
D’aute biais, en relacion ara mobilitat, era Generalitat a establit un confinament perimetrau per municipis pendent es dimenjades, que serà vigent des des 6 ores de diuendres enquias 6 ores de deluns. Per tant, es vesins/es de Vielha e Mijaran sonque se poderàn botjar, en aguest periòde, per laguens deth tèrme, en tot poder desplaçar-se pes diuèrsi pòbles deth municipi.
En çò que tanh ara hestivitat de Tot Sants, se permeterà era mobilitat pendent es dies 31 d’octobre 1 de noveme en pròpri municipi, atau coma eth desplaçament as cementèris dera rèsta de municipis dera Val d’Aran, en tot esvitar es aglomeracions der 1 de noveme.
Aguestes restriccions entraràn en vigor aguest diuendres 30 d’octobre, un viatge siguen publicades aguesta maitiada en Diari Oficiau dera Generalitat (DOGC).