Notícies Veir istoric
Vielha e Mijaran s’ahig a RECICLOS, eth prumèr sistèma de reciclatge digitau creat per Ecoembes, que refortilhe era sostenibilitat e solidaritat en municipi
Aguesta pròva pilòt deth Conselh Generau d’Aran digitalize eth reciclatge des ampolhes e lhaunes de plastic e compense ara ciutadania comprometuda damb eth medi ambient
Eth municipi de Vielha e Mijaran se place en un lòc capdeuantèr ena sostenibilitat e solidaritat en airau deth reciclatge, damb era sua incorporacion a RECICLOS, eth prumèr sistèma de reciclatge digitau creat pera enterpresa Ecoembes, ena que s’incorpòre era tecnologia mobila e ena qu’i hèn part diuèrsi municipis de Catalonha.
Era pròva pilòt deth Conselh Generau d’Aran en territòri s’inície en Vielha e Mijaran e a coma objectiu digitalizar eth reciclatge d’ampolhes e lhaunes de plastic, en tot compensar a toti/es aqueri/eres que se mòstren comprometudi en aguest airau, damb incentius sostenibles e sociaus. Es vesins/ies deth municipi poiràn reciclar es sues ampolhes e lhaunes de plastic en un des 62 contienedors auriòs des sòns pòbles –enes quaus s’a incorporat aguesta tecnologia– e obtier recompenses en hè’c. Entre aguesti incentius, destaquen productes entà fomentar era mobilitat sostenibla e accions sociaus coma contribucions ath Banc d’Aliments dera Val d’Aran.
Entà hèr a servir RECICLOS, era ciutadania de Vielha e Mijaran sonque a d’accedir ara webapp (https://app.reciclos.com) e registrar-se, escanejar eth còdi de barres der envàs que vòlen reciclar e dipositar-lo en un des contienedors auriòs. D’aguesta forma, obtieràn punts, nomentadi Reciclos, que poiràn escambiar per diferents incentius.
“Aguest projècte que mos pòrte eth Conselh Generau d’Aran dera man de Ecoembes da un pas endeuant en airau dera sostenibilitat e solidaritat damb er entorn naturau, e aufrís era possibilitat de qu’era ciutadania que sigue comprometuda, recebe ua compensacion pera sua bona conducta”, comente eth baile de Vielha e Mijaran, Juan Antonio Serrano.
03/11/2020