Notícies Veir istoric
Vielha e Mijaran renauís er acòrd de collaboracion damb era associacion 4Pautes entà garantir era proteccion e eth benèster animau
Er Ajuntament de Vielha e Mijaran ei eth prumèr consistòri dera Val d’Aran en cooperar damb aguesta entitat, a compdar de 2017, e enguan se refortilharà eth trabalh des colònies de gats sauvatges
Er Ajuntament de Vielha e Mijaran e era associacion animalista Amics dels Animals 4Pautes an tornat a renauir eth convèni de collaboracion damb eth que trabalhen entà garantir era proteccion e eth benèster animau. Er Ajuntament de Vielha e Mijaran siguec eth prumèr consistòri dera Val d’Aran en cooperar damb era associacion animalista, a compdar de 2017.
D’aguesta manèra, en tot seguir damb era estreta collaboracion d’ans endarrèr, er Ajuntament de Vielha e Mijaran ajude en tot çò de possible entà suenhar es animaus domestics trapadi e arremassadi en municipi.
Enguan se vò dar un pas endeuant en contròl des colònies de gats en municipi damb era aplicacion dera metodologia CES (Captura, Esterilización y Suelta). Se crearà ua comission de seguiment e monitorizacion formada per dus membres der ajuntament e dus dera associacion, entà hèr un seguiment e contròl des colònies de gats que i a en municipi, esterilizacions, animaus abandonadi e/o mautractadi, e controlar era execucion des despenes que se’n deriven.
Pera sua part, 4Pautes seguirà en tot informar de toti es animaus que se trapen en municipi, atau coma dera sua recuelhuda e suenh enquia que siguen adoptadi, denonciar quinsevolh tipe de mautracte animau, e capturar es gats sauvatges entà esterilizar-les e posteriorament deishar-les en colònies controlades.
Ath delà, eth consistòri e era associacion animalista vòlen contunhar en tot conscienciar ara gent sus eth bon tracte as animaus.
“Er Ajuntament de Vielha e Mijaran siguec pionèr ena Val d’Aran ena collaboracion e cooperacion damb era associacion 4 Pautes, entà fomentar era proteccion e suenh des animaus domestics que son abandonadi o trapadi enes carrèrs, e volem seguir en tot ajudar-les enes diuèrsi tramits prealables ara sua adopcion”, comente eth baile de Vielha e Mijaran, Juan Antonio Serrano. E ahig que “auem de préner consciéncia deth bon tracte as animaus, e damb aguesta premisa, balharam supòrt entà hèr campanhes entà qu’era gent sigue responsable e esvitar eth mautracte e er abandonament des animaus”.