Notícies Veir istoric
Aguest dimenge, Vielha acuelh era celebracion dera 1èra “Era Maraton Solidària”
Un rèpte solidàri virtuau ideat per Javi Cavero, vesin de Vielha e Mijaran, en qu’era gent pòt participar en tot aquerir eth dorsau o aufrir un donatiu, e toti es sòns requectadi anaràn destinadi ath Banc d’Aliments dera Val d’Aran
Aguest pròplèu dimenge, 15 de noveme, Vielha serà er escenari dera 1èra “Era Maraton Solidària”, un rèpte solidari ideat per Javi Cavero, vesin de Vielha e Mijaran, que compde damb era collaboracion der Ajuntament de Vielha e Mijaran e es Volontaris d’Aran, en tot requectar sòs entath Banc d’Aliments dera Val d’Aran.
Aguest rèpte consistís en completar era distància d’ua maraton de 42,8 kms qu’en cas de Javi realizarà 42 torns a un petit circuit d’1,02 kms entre era passarèla plaçada ena Avenguda Eth Solan (deuant der Espitau Val d’Aran), en tot pujar enquiath pònt deuant der INS d’Aran e tornar a baishar parallelament ar arriu Garona enquiara passarèla. Er objectiu ei hèr espòrt (córrer, caminar, passejar damb es cans, etc.), en familha o damb amics, respectant es mesures de seguretat deuant dera Covid, en tot èster solidari damb qui mès ac a de besonh, era idèa ei que cadun/ua ac pogue realizar segontes era sua volontat e possibilitats enes sons pòbles o lòcs de residéncia.
Toti/es aqueri/es que volguen participar d’aguesta accion solidària pòden aquerir eth sòn dorsau per 5€ en tot hèr ua transferéncia bancària ath compde bancari des Volontaris d’Aran (ES 0900815127460001136816) en tot indicar eth nòm complèt e enviar un corrèu electronic a eramaratonsolidaria@gmail.com, o en tot enviar un messatge de WhatsApp ath telefòn 696206066. Javi Cavero realizarà eth rèpte entre es 10 e es 14 ores.
Tanben s’i pòt participar en tot aufrir donacions liures, que tanben s’auràn de realizar en compde bancari des Volontaris d’Aran abantes mencionada. Toti es sòns requectadi, autant des dorsaus, coma des donacions, anaràn integrament destinadi ath Banc d’Aliments dera Val d’Aran.
Era arremassada de dorsaus e donacions presenciaus, s’amiarà a tèrme diuendres e dissabte, en orari des 17 as 20 ores enes cubèrts der Ajuntament de Vielha e Mijaran.
Entà balhar mès difusion a d’aguesta iniciatiua, toti/es qu’i participatz, podetz compartir ua fotografia enes hilats sociaus damb era vòsta collaboracion, en tot ahíger eth hashtag #EraMaratonSolidària.
“Mos trapam en uns moments economics complicats arraïtz dera aparicion dera COVID-19, e fòrça gent a de besonh ajuda. Per aquerò vos encoratgi a toti/es a acompanhar-me en aguest rèpte e aportar, ena mesura que pogatz, eth vòste supòrt, e m’ajudetz a poder donar eth maxim de sòs possibles ath Banc d’Aliments dera Val d’Aran”, comente Javi Cavero, responsable d’Era Maraton Solidària.
Pera sua part, Juan Antonio Serrano, baile de Vielha e Mijaran, ahig que “des der Ajuntament damb supòrt a d’aguesta e d’autes possibles iniciatives solidàries, pr’amor que credem qu’ei important era participacion de toti/es en accions que servisquen entà ajudar a qui ac a de besonh, e vos convidam a qu’i prengatz part”.