Notícies Veir istoric
Er Ajuntament de Vielha e Mijaran gestione es ajudes extraordinàries implementades entà hèr front ara crisi economica provocada pera COVID-19 a mès de 800 persones
Un viatge acabat eth tèrme de presentacion, ara a de resòlver es demanes e tanben trabalhe en un convèni damb eth Conselh Generau d’Aran entà ajudar a persones en risc d’exclusion sociau, damb ua partida de 100.000€
Er Ajuntament de Vielha e Mijaran a enregistrat mès de 800 ajudes des desparières linhes d’ajudes e subvencions extraordinàries qu’enguan a metut en foncionament entàs vesins/es empadronadi/es en Vielha e Mijaran, entà lutar contra era crisi economica derivada dera aparicion dera pandémia dera COVID-19.
Totes aguestes ajudes e subvencions extraordinàries, a on tanben s’an d’includir era trentia de persones contractades enes plans aucupacionaus, s’amien a tèrme en un moment economic complicat, des dera declaracion der estat d’alarma eth passat mes de març a consequéncia dera COVID-19, e qu’a portat a fòrça familhes e negòcis a auer problèmes entà poder subervíuer, pr’amor que fòrça gent a perdut temporau o definitiuament eth sòn lòc de trabalh.
Atau madeish, er Ajuntament de Vielha e Mijaran amassa damb eth Conselh Generau d’Aran se trapen en tot finalizar era redaccion d’ua naua linha d’ajuda que compdarà damb ua partida de 100.000€ dirigida as persones que se trapen en risc d’exclusion sociau e, per tant, que son fòrça vulnerables deuant dera crisi economica d’enguan e, sustot, en tot pensar de cara a 2021.
Fin finau, era soma d’aguest plan d’ajudes extraordinàries implementades enguan per Ajuntament de Vielha e Mijaran serà de mès de 500.000€, entà ajudar ara ciutadania deth municipi a paliar bona part des efèctes dirèctes dera crisi economica provocada pera pandémia.
“Era prioritat der Ajuntament son es nòsti/es vesins/es e es sòns negòcis e lòcs de trabalh en aguesti moments economics complicadi. Per aquerò, implementèrem tot un seguit d’ajudes extraordinàries, que sajaram de resòlver tant lèu coma sigue possible”, comente eth baile de Vielha e Mijaran, Juan Antonio Serrano. E ahig que “er objectiu d’aguestes mesures extraordinàries ei paliar es efèctes economics causadi pera COVID-19, e per aquerò seguiram en tot ajudar damb naues accions, laguens des nòstes possibilitats, entà èster ath vòste costat, pr’amor qu’encara trigaram un temps en poder tornar a ua cèrta normalitat”.
13/11/2020