Notícies Veir istoric
Vielha e Mijaran apròve era 4au modificacion de credit deth pressupòst municipau d’enguan
Eth consistòri, pendent aguestes darrères setmanes der an e eth prumèr trimesadèr de 2021, realizarà melhores en servicis basics coma son eth hilat d’aigües, es viaus e reformes enes equipaments municipaus
Aguest deluns, eth plen der Ajuntament de Vielha e Mijaran, amassat en session extraordinària, a aprovat era 4au modificacion de credit deth pressupòst municipau d’enguan, damb eth que poderà realizar fòrça accions pendent es setmanes que manquen entà acabar er an e eth prumèr trimesadèr de 2021.
Aguesta modificacion, qu’a compdat damb es vòts a favor deth grop d’Unitat d’Aran e es vòts en contra dera oposicion de Convergéncia Aranesa e Aran Amassa, permeterà fòrça accions de gran benefici entath municipi pendent aguest iuèrn coma: estudis e trabalhs tecnics d’urbanisme entà poder amiar a tèrme licitacions en 2021, eth mantenement des vies publiques, sustot damb era arribada des nheuades e es gelades der iuèrn, elaborar un informe sus er estat des arbes plaçadi en parcatge des antigues casèrnes militares de Vielha, que se trapen en un estat fòrça maumerenc entà saber quina intervencion s’a de realizar, substituir er enlumenat actuau deth Centre Polivalent e deth Palai d’Espòrts per un sistèma de lums LED, era reforma des lavabos deth Centre Polivalent, apariar era piscina petita deth Palai de Gèu, pr’amor que cause filtracions enes vestiaris, e trabalhs de canalizacion der aigua enes pòbles de Betren e de Casau, entre d’auti.
Era màger part d’aguestes intervencions se desvoloparàn damb romanent de tresaureria deth consistòri, arraïtz de qu’eth govèrn espanhòu age decidit suspéner es nòrmes fiscaus des ajuntaments e permet emplegar es romanents de tresaureria d’aguestes administracions locaus pendent aguest an e en 2021.
“Pendent aguesti pròplèu mesi, amiaram a tèrme tot un seguit d’actuacions en benefici de bona part deth municipi, en tant que gràcies ath desbloqueig deth romanent de tresaureria per part deth govèrn espanhòu, haram intervencions entà melhorar eth foncionament des servicis basics, atau coma des equipaments municipaus”, comente eth baile de Vielha e Mijaran, Juan Antonio Serrano. E ahig que “de cara ar an que ven, tanben s’aplicaràn fòrça mès mesures entà melhorar eth benèster dera ciutadania de Vielha e Mijaran”.