Notícies Veir istoric
Vielha e Mijaran barre eth pressupòst municipau de 2021 damb dificultats pera aparicion dera COVID-19
Enguan i a agut ua baishada des ingrèssi, mès s’a aumentat considerablament es ajudes ara ciutadania entà paliar es efèctes dera pandémia, e en 2021 i aurà fòrça mès ajudes
Aguest maitin, eth plen der Ajuntament de Vielha e Mijaran amassat en session ordinària a aprovat iniciaument eth pressupòst municipau de 2021, damb es vòts a favor deth govèrn d’Unitat d’Aran e es vòts en contra dera oposicion de Convergéncia Aranesa e Aran Amassa.
Un pressupòst finau avalorat en 6.102.034,43 € mercat pera dificultat de barrar es compdes, a conseqüéncia d’auer agut mens ingrèssi pera aparicion dera COVID-19. D’aute biais, enguan eth consistòri a destinat fòrça mès partides d’ajudes extraordinàries entà desparièrs sectors dera societat, entà paliar es efèctes dera pandémia. Ues ajudes que s’alongaràn pendent 2021, damb fòrça mès partides, entà poder ajudar a mès sectors dera societat.
En plen tanben s’a balhat compde dera suspension dera taxa des terrasses as establiments ostalèrs entà 2021, en tot supausar ua contunhacion dera mesura prenuda tanben enguan.
Atau madeish, pendent eth plen d’aué tanben a prenut possession era naua còsso d’Unitat d’Aran, Yolanda Riestra, qu’a jurat eth sòn cargue enquia qu’acabe era actuau legislatura.
“Enguan, a conseqüéncia dera COVID-19, a estat fòrça dificil barrar es pressupòsti municipaus de 2021, pr’amor qu’auem agut mens ingrèssi qu’en ans anteriors. De totes manères, tanben s’an implementat fòrça mès ajudes destinades as familhes e ath sector empresariau tà ajudar-les a paliar es efèctes dera pandémia, e que contunharam eth pròplèu an damb mès partides as qu’era gent s’i pogue acuélher”, comente eth baile de Vielha e Mijaran, Juan Antonio Serrano.
27/11/2020