Notícies Veir istoric
Vielha e Mijaran planifique era prevencion d’incendis entà protegir es pòbles e er entorn naturau
Er Ajuntament e es EMDs impulsen ua accion de 114.042,50 èuros, IVA includit, damb ua aportacion dirècta municipau de 51.137,50 èuros as entitats descentralizades entà redigir es sòns plans de prevencion
Er Ajuntament de Vielha e Mijaran e es Entitats Municipaus Descentralizades deth municipi impulsen era redaccion des documents tecnics de besonh entà refortilhar era prevencion d’incendis forestaus, milhorar era gestion deth bòsc e deth païsatge, e protegir es nuclèus abitadi e er entorn naturau.
Aguesta accion permeterà disposar d’ua planificacion actualizada entà ordenar futures intervencions de neteja, mantenença e gestion dera vegetacion enes zònes de contacte entre es pòbles e eth terren forestau. En un municipi de nauta montanha coma Vielha e Mijaran, damb ua grana extension territoriau e nombrosi nuclèus de poblacion, era prevencion ei un estrument clau entà redusir risqui abans de que se produsisque ua emergéncia.
Er Ajuntament a encargat era redaccion deth plan de delimitacion des franges d’emparament de 25 mètres entath conjunt deth municipi, damb un còst de 23.776,50 èuros, IVA includit. Aguest document identificarà es contorns a on auràn d’aplicar-se mesures de prevencion ath torn de nuclèus urbans, edificacions e installacions plaçades en zònes pròplèus ar entorn forestau.
Atau madeish, er Ajuntament redigirà eth sòn pròpri Plan de Prevencion d’Incendis Forestaus, damb un còst de 13.128,50 èuros, IVA includit. En conjunt, es trabalhs contractadi dirèctaments per Ajuntament de Vielha e Mijaran arriben ara quantitat de 36.905 èuros, IVA includit, e compden damb ua subvencion de 6.000 èuros dera Generalitat de Catalunya.
Parallèlaments, es sèt EMDs deth municipi -Betren, Casau, Aubèrt e Betlan, Escunhau e Casarilh, Gausac, Vilac e Arròs e Vila- contractaràn es sòns pròpris plans de prevencion d’incendis forestaus, adaptadi ara realitat de cada pòble e deth sòn entorn. Eth còst totau d’aguesti documents ei de 77.137,50 èuros, IVA includit.
Era Generalitat de Catalunya a concedit as EMDs un totau de 26.000 èuros entad aguesti trabalhs. Era part restanta, que puge a 51.137,50 èuros, serà finançada integralaments per Ajuntament de Vielha e Mijaran mejançant ua aportacion economica dirècta as entitats descentralizades. Damb aguesta ajuda municipau, er Ajuntament garantís que totes es EMDs poguen disposar deth sòn pròpri estrument de planificacion sense auer d’assumir damb recorsi pròpris era part non corbida pera subvencion.
En totau, era accion artenh ua inversion de 114.042,50 èuros, IVA includit. D’aguesta quantitat, era Generalitat de Catalunya apòrte 32.000 èuros en subvencions, deth temps qu’er Ajuntament de Vielha e Mijaran assumís 82.042,50 èuros, en tot includir es trabalhs municipaus e eth finançament dirècte as EMDs.
Des der Ajuntament se remèrque qu’aguesti documents non son sonque ua obligacion tecnica, senon un estrument de seguretat e d’emparament deth territòri. Era gestion deth bòsc, era mantenença deth païsatge e era organizacion des franges d’emparament son accions fonamentaus entà redusir era vulnerabilitat des pòbles, protegir abitatges e infrastructures e facilitar era intervencion des equipes d’emergéncia en cas d’incendi.
“Era prevencion d’incendis comence fòrça abans de qu’apareishe eth huec. Comence en tot planificar, en tot gestionar eth bòsc, en tot suenhar eth païsatge e en tot trabalhar amassa damb es EMDs. Çò que hèm ei trabalhar pera seguretat des vesins, des nòsti pòbles e des nòstes montanhes”, a soslinhat eth tinent d’alcalde, Alberto López López.
Damb aguesta iniciatiua, Vielha e Mijaran auance en ua estratégia comuna de prevencion e emparament deth territòri, damb er objectiu de redusir risqui, milhorar era seguretat des nuclèus abitadi e preservar er entorn naturau deth municipi.
Lieger mès
11/06/2026
Er Ajuntament de Vielha e Mijaran amplie eth pati dera Escòla Garona en mès de 400 m²
Lieger mès
09/06/2026
Vielha e Mijaran apròve era 3au modificacion de credit deth pressupòst municipau per valor de 76.638,56€
Lieger mès
27/05/2026
Aguest dissabte, 23 de mai, se daurís era convocatòria de subvencions de Vielha e Mijaran de 2026
Lieger mès
