Notícies Veir istoric
S’a omenatjat eth 13au anniversari dera Bibliotèca Generau de Vielha
Damb activitats es mesi de noveme e deseme
Era Bibliotèca Generau de Vielha a amiat a tèrme diuèrses activitats entà hestejar eth sòn 13au anniversari ath long des mesi de noveme e deseme. A part des activitats dubèrtes ath public qu’èren programades, tanben s’a acuelhut un espectacle de circ e era exposicion Ecojoguets.
Entà celebrar era data en totau s’an realizat ua desena d’activitats, qu’entre eres se trapen ‘Maleta de condes’, ‘Libres entà créisher’, un talhèr d’escritura creatiua, era presentacion deth libre En fila india e fòrça mès accions entà promòir era lectura.
Per un aute costat, pendent eth mes de noveme, era Bibliotèca a arrecebut visites d’estudiants de collègis dera Val d’Aran: 121 escolans de collègis dera Zòna Escolara Rurau s’apropèren enquiath centre entà conéisher eth mon deth circ e gaudiren damb er espectacle dera companhia ‘Sonríe x Narices’.
Aguest mes de deseme, eth centre a acuelhut era exposicion deth concors Ecojoguets. Se tracte de joguets elaboradi pes mainatges dera Val d’Aran damb materiau reciclat dera campanha ‘Aran recicle’, promoiguda peth Conselh Generau d’Aran e era Agència de Residus de Catalonha.
Fin finau, s’arrebrembe qu’es dijaus se realize eth ‘Talhèr de diboish e pintura’, a cargue de José Fenoy. E as que les agrade liéger, tostemp se pòden incorporar as diuèrsi clubs de lectura qu’aufrís era Bibliotèca.
21/12/2014