Notícies Veir istoric
Era Generalitat a aprovat un paquet de mesures a complir pes explotacions avicòles deuant deth risc d’introduccion deth virus dera Influéncia Aviària de Nauta Patogenicitat
Aguesta normativa garantís era sanitat animau e era innocuïtat des productes que s’en deriven des aus de corrau qu’es particulars an entar autoconsum
Era Generalitat de Catalunya a hèt efectiua era resolucion ARP/3320/2020 deth 15 de deseme, pera quau s’adòpten mesures sanitàries entà previer era introduccion deth virus dera Influéncia Aviària de Nauta Patogenicitat (IAAP) e qu’an de complir totes es explotacions aviàries de Catalonha enquiath pròplèu 21 de hereuèr.
Damb era aplicacion d’aguesta normativa se garantís era salut des aus de corrau, atau coma era manca de perilh per part des productes que s’en poguen derivar (carn e ueus) entar autoconsum per part des particulars.
D’aguesta manèra, se proïbís era cria conjunta des lits e auques damb d’autes espècies d’aus de corrau. Se considère cria conjunta, aqueri animaus plaçadi en madeish locau o recinte; en cas d’aus estabulades, aqueres que compartissen era madeisha cubicacion d’aire.
Tanben se proïbís era cria d’aus de corrau ar aire liure. Se poderà autorizar eth plaçament de teles entà audèths o quinsevolh aute dispositiu qu’empedisque era entrada d’aus sauvatges tostemps qu’eth minjar e er aigua se trape en interior des installacions o en un refugi qu’empedisque eth contacte damb es aus sauvatges.
Atau madeish, demore proïbit dar aigua as aus de corrau procedenta des depòsits d’aigua a on i poguen accedir aus sauvatges, a exceptat de qu’er aigua sigue tractada entà garantir era inactivacion de possibles virus dera influéncia aviària.
Es depòsits d’aigua plaçadi en exterior, de besonh per motius de benèster animau entà determinades aus de corrau, an d’èster protegidi de manèra que non i poguen accedir aus sauvatges.
Ath delà, serà obligatòri notificar immediatament ara Oficina Comarcau deth DARP corresponent, era deteccion de quauqu’un de següents signes d’explotacion: disminucion deth consum deth minjar deth bestiar e era aigua superior ath 20%, disminucion dera pòsta superior ath 5% pendent mès de 2 dies consecutius, sense causa justificada, mortalitat superiora ath 3% pendent ua setmana, sense causa justificada, e quinsevolh signe clinic o lesion post mortem que pogue èster causada pera influéncia aviària.
11/01/2021