Notícies Veir istoric
Er Ajuntament de Vielha e Mijaran daurís era 2au convocatòria entà sollicitar ajudes ath comèrç, PIMES e autonòms deth municipi afectadi pera COVID-19 en 2au semèstre de 2020
En tot somar es dues linhes d’ajudes, eth sector se beneficiarà d’un maxim de 800€ per enterpresa entath pagament dera despena de materiaus e EPIS de proteccion a compdar dera aparicion dera pandémia
Er Ajuntament de Vielha e Mijaran aufrís, a compdar d’aguest dimars 12 de gèr, ua naua linha d’ajudes ath comèrç, PIMES e autonòms deth municipi entà ajudar-les a paliar es despenes qu’an agut de sufragar com a conseqüéncia dera COVID-19.
En aguest sens, eth consistòri a daurit era 2au convocatòria entà qu’es PIMES (de mens de 20 trabalhadors) e autonòms qu’agen era sua activitat empresariau en Vielha e Mijaran, poguen demanar ua subvencion entà ajudar en pagament de materiaus e EPIS de proteccion deuant dera pandémia, qu’aueren de crompar en 2au semèstre de 2020.
Eth periòde imputable ei der 1 de junhsèga ath 31 de deseme de 2020, en tot concedir-se sonque ua ajuda per sollicitant. Era quantitat dera subvencion autrejada serà deth 50% der impòrt des factures enquia un maxim de 400€. De manèra qu’en tot somar era ajuda autrejada ena prumèra convocatòria, eth teishit empresariau s’aurà beneficiat d’un maxim de 800€ entà paliar es efèctes dera pandémia ena sua activitat economica.
Tota era informacion entà poder sollicitar era ajuda, atau coma eth formulari e era justificacion, son plaçadi ena plana web der Ajuntament de Vielha e Mijaran e se poderà presentar en registre der Ajuntament presenciaument en tot demanar ora en telefòn 973640018 o pera sedença electronica https://vielha-mijaran.eadministracio.cat.
Es sollicitants poderàn demanar aguesta ajuda enquiath pròplèu 1 de hereuèr. Ei important en moment dera sollicitud èster ath corrent deth pagament damb era Seguretat Sociau, damb era Agència Tributària e damb era Isènda Municipau.