Notícies Veir istoric
Eth baile de Vielha e Mijaran a participat aué en ua amassada virtuau damb representants deth mon locau pirenenc, entà demanar ara generalitat mesures pròpries contra era pandémia
Es demandes s’an concretat damb era redaccion d’un manifèst conjunt, en qu’a participat Vielha e Mijaran, entà demanar ara Generalitat qu’eth Pirenèu sigue escotat ena luta contra era pandémia, damb mesures particulares
Eth baile municipau, Juan Antonio Serrano, a prenut part aguest maitin en ua amassada virtuau damb d’auti representants dera administracion locau deth Pirenèu (bailes e representants des conselhs comarcaus), en quau tanben i a participat eth Conselh Generau d’Aran, a on s’an recuelhut totes es inquietuds qu’a eth territòri, damb er objectiu finau de redactar eth manifèst que s’a hèt arribar ara Generalitat, en tot esvitar qu’eth Pirenèu sigue considerat dera madeisha forma qu’es zònes metropolitanes.
Er Ajuntament de Vielha e Mijaran a participat ena redaccion deth manifèst elaborat peth mon locau deth Pirenèu entà demanar ara Generalitat de Catalunya que s’apliquen mesures especifiques e diferenciades a d’autes regions de Catalonha, ena luta pera contencion dera pandémia dera COVID-19, en tot deféner era singularitat d’aguesta zòna.
Era
preocupacion dera administracion locau deth Pirenèu aumente, sustot,
en saber qu’aué madeish era Generalitat a decidit prorrogar es
restriccions efectives des deth passat 7 de gèr, pendent sèt dies
mès (enquiath 24 de gèr).
En aguest sens, eth manifèst demane, entre d’autes mesures, qu’era mobilitat sigue comarcau, en compdes de municipau coma ei vigent ara, sense renonciar ar airau territoriau dera region sanitària coma unitat territoriau de confinament.
Atau
madeish, tanben se demane ara Generalitat qu’era mobilitat sigue
transfronterèra, de manèra qu’era gent pogue viatjar e interactuar
damb França, Andòrra e Aragon.
Eth sector dera restauracion ei un aute des punts importants, pr’amor qu’ei un des mès afectadi damb es restriccions actuaus, en tot auer vist amendrida era sua activitat economica de forma considerabla. En aguest sens, se demane que se tengue en compde era especificitat pirenenca, en tot perméter recuperar era franja de dubertura deth servici de sopars. S’a demostrat qu’autant era restriccion dera ostalaria e era restauracion, atau coma eth barrament deth comèrç non essenciau pendent es dimenjades, non an cap de sentit.
“Damb era redaccion d’aguest manifèst, en tot auer-se implicat tota era administracion locau deth Pirenèu, dam un pas endeuant important, en tot mostrar era fòrça deth mon locau, entà èster escotadi pera Generalitat, e que se poguen aplicar mesures ena luta contra era COVID-19 especifiques e adaptades ara realitat deth nòste territòri”, comente eth baile de Vielha e Mijaran, Juan Antonio Serrano. E ahig que “era preocupacion ena societat e en teishit empresariau ei anauta e en ua situacion limit, e ei ora d’èster tractadi coma meritam per part des autoritats”.