Notícies Veir istoric
Er Ajuntament de Vielha e Mijaran comence es òbres de reforma des banhs deth Centre Polivalent
Damb aguesta intervencion s’amiarà a tèrme ua ampliacion e melhora d’aguesti espacis, damb er objectiu de poder celebrar activitats que permeten ua nauta afluéncia de gent ena installacion
Aguesta setmana s’an iniciat es trabalhs de reforma des banhs deth Centre Polivalent de Vielha e Mijaran. Ua intervencion qu’ère fòrça de besonh, pr’amor qu’aguest equipament municipau siguec bastit hè 35 ans (en an 1985) e en tot aguest temps non s’i an hèt guaire melhores.
Er Ajuntament de Vielha e Mijaran treiguec a licitacion aguesti prètzhèts, pr’amor qu’ara madeish i a fòrça elements coma era distribucion, eth nombre d’elements, o era manca de lavabos entà minusvalids, que non complissen damb era normativa vigenta.
Damb aguesta intervencion se realizarà era reforma integrau des espacis qu’aucupen es actuaus lavabos, en tot plaçar-ne de naui que permeten acuélher ath torn de 450 persones, de manèra qu’era installacion pogue amassar activitats coma reünions, eveniments esportius o culturaus, entre d’auti. En tot seguir era normativa actuau, se bastirà tanben un lavabo adaptat entà minusvalids.
Pendent era execucion d’aguesta reforma, tanben s’amiarà a tèrme era substitucion deth vielh sistèma d’enlumenat d’aguest espaci, que ja demore obsolet, per un nau sistèma de lums LED, que permeterà un estauvi energetic important.
Eth totau d’aguesta intervencion compde damb un pressupòst de 120.406,75€ e era durada des òbres serà apuprètz de 3 mesi.
Aguesta reforma des banhs completarà es actuacions que s’an hèt pendent es darrèri ans en Centre Polivalent e ena Plaça d’Aran, qu’ei a on se trape plaçat er equipament.
En çò que tanh ara bastissa, en 2019 s’amièc a tèrme er apariament de tot eth tet e es elements que lo conformen, en tot melhorar-ne eth sòn estat, pr’amor qu’ère fòrça deficient, e atau esvitar era aparicion de filtracions d’aigua que podie provocar qu’es usatgèrs se hessen mau mentre emplegauen era sala en quauqua activitat. Pendent aguesta intervencion tanben se substituïc eth vielh sistèma d’enlumenat per un nau damb lums LED, en tot generar un important estauvi energetic. Atau madeish, ena façada exteriora se realizèc un lauat d’imatge complèt, pr’amor qu’ère deteriorada e lorda.
Previament, en 2018, er Ajuntament melhorèc er estat dera Plaça d’Aran, ath cant deth Centre Polivalent, en tot acabar de deishar tot aguest parçan en un estat fòrça mès polit e adaptat as besonhs d’aguest airau enes tempsi actuaus, autant enes accèssi, coma en bastiment de places de parcatge ben delimitades.
“Era reforma des banhs deth Centre Polivalent ei eth darrèr pas que manque ena reforma d’aguest equipament, en tot adaptar-le entà que s’i pogue celebrar activitats a on i age ua nauta preséncia de gent, coma pòden èster congressi, eveniments esportius, eca, que permeterà dar un nau impuls ara activitat economica deth municipi enes pròplèu ans”, comente eth baile de Vielha e Mijaran, Juan Antonio Serrano. E ahig que “dempús dera anteriora reforma n’aguest equipament e dera Plaça d’Aran qu’auem amiat a tèrme enes darrèri ans, auram aguest airau enes condicions avientes e que merite era ciutadania deth nòste municipi”.
05/02/2021