Notícies Veir istoric
Vielha e Mijaran modifique dues escòles electoraus e càmbie de lòc tres meses respècte as darrères eleccions entà garantir era seguretat sanitària entàs eleccions ath Parlament de Catalunya deth pròplèu 14 de hereuèr
Eth Centre de Joenessa “Antara” aurà dues meses, atau coma eth Centre de Formacion d’Adults, que se plaçaràn en pati cubèrt, enes locaus sociaus Gausac e Escunhau n’i aurà ua, atau coma ena antiga escòla d’Aubèrt
Er Ajuntament de Vielha e Mijaran a decidit modificar er emplaçament de diuèrses meses electoraus entàs eleccions ath Parlament de Catalunya deth pròplèu 14 de hereuèr per motius de seguretat deuant era pandémia dera COVID-19. En totau, Vielha e Mijaran compdarà damb 7 meses electoraus distribuïdes en 5 collègis electoraus que serviràn entà que poguen votar es vesins e vesies des 13 pòbles deth municipi.
Eth consistòri a optat per mantier eth maxim de centres de votacion possibles, tostemp e quan se poguen mantier es mesures de seguretat e igiene vigentes. En aguest sens, en Vielha s’a decidit qu’eth Centre de Joenessa “Antara” (carrèr Arnals, 2) sigue eth lòc escuelhut entà acuélher dues meses electoraus en substitucion deth Casau de Jubilats “Sant Miquèu”, que tradicionaument ère un des collègis electoraus, pr’amor qu’er espaci ei mès gran e permet ua melhor aplicacion des normes de seguretat.
Atau madeish, eth Centre de Formacion d’Adults tanben acuelherà dues meses electoraus, qu’aguest viatge seràn plaçades en pati cubèrt que i a ath cant deth parc infantil, damb un espaci mès ample qu’enes aules coma ère abituau en anteriors comicis.
D’aute biais, es locaus sociaus de Gausac e Escunhau, compdaràn damb ua mesa electorau cadun. En Aubèrt, a causa d’ua pana en subministrament d’aigua en locau sociau, era mesa electorau se plaçarà ena antiga escòla, que se trape ath cant deth pròpri locau sociau.
En tot moment, aguesti espacis complissen damb es mesures de besonh de seguretat entà celebrar es comicis: espacis amplis e ventiladi, distància interpersonau de seguretat e a on se poderà diferenciar es circuits d’entrada e de gessuda.