Notícies Veir istoric
S’an iniciat es òbres de melhora der enlumenat deth Centre Polivalent
Er Ajuntament de Vielha e Mijaran amie a tèrme eth plaçament d’un sistèma de lums LED que generarà ua màger eficiéncia energetica
Pendent aguesta setmana s’an iniciat es òbres de reforma der enlumenat deth Centre Polivalent de Vielha. Ua intervencion que permeterà, a trauès dera installacion d’un sistèma de lums LED, ua melhora dera qualitat der enlumenat d’aguest equipament esportiu municipau, atau coma amendrir eth consum energetic pendent eth sòn emplec.
Ena installacion compdaue enquiara damb 8 luminàries de tipe incandescent damb un naut consum energetic. Atau madeish, er estudi d’illuminància realizat en espaci determinèc qu’ei insufisenta entara practica esportiua. Per tant, s’installaràn luminàries damb major rendiment entà auer un enlumenat avient, en tot melhorar-ne eth consum energetic. S’i plaçarà ua campana industriau LED, tanben damb proteccion dera lent de policarbonat.
En çò que tanh as normatives d’enlumenat d’installacions esportiues, eth Centre Polivalent ei plaçat ena categoria de tipe 3 (entrenament generau, educacion fisica e activitats recreatiues).
“Aguesta actuacion ère fòrça de besonh, pr’amor qu’eth sistèma d’enlumenat actuau dera installacion ère ja obsolet e s’auie de renauir. Damb eth sistèma de lums LED generaram ua màger eficiéncia energetica, en tot implementar un estrument mès de qualitat e modernitat as installacions esportiues municipaus”, comente eth dusau tinent d’alcalde e còsso d’espòrts de Vielha e Mijaran, Alberto López.